धरान । अख्तियार दुरुपयोग अनुसन्धान आयोगले धरानका तत्कालीन प्रशासकीय अधिकृत गणेशप्रसाद खतिवडासहित नौ जनाविरुद्ध भ्रष्टाचार मुद्दा दायर गरेको छ ।

आयोगले बिहीबार विशेष अदालत काठमाडौंमा आरोपपत्र दायर गरेको हो ।

मुद्दा दायर हुनेमा खतिवडासहित तत्कालीन सिंगिया गाविसका अध्यक्ष/सचिव कपिलमणि दाहाल, मालपोत कार्यालय सुनसरीका तत्कालीन मालपोत अधिकृत सुशील वैद्य, तत्कालीन शाखा अधिकृत तुङ्गनाथ भण्डारी, तत्कालीन नायब सुब्बा केदारबहादुर कार्की, तत्कालीन धरान नगरपालिका–१४ का वडा सचिव उत्तम आले, नरसिंह भगवान मन्दिरका पुजारी टिर्रु चौधरी तथा जग्गा कारोबारमा संलग्न पंकज घिमिरे र भागमैन थरुनी छन् ।

मन्दिरको जग्गा व्यक्तिको नाममा दर्ता

अख्तियारका अनुसार सुनसरीको साविक भादगाउँ सिनवारी गाविस–४ स्थित नरसिंह भगवान मन्दिरको नाममा रहेको ५ कठ्ठा ७ धुर र ४ कठ्ठा १८ धुर गरी दुई कित्ता सार्वजनिक जग्गा गलत प्रतिवेदनका आधारमा पुजारी टिर्रु चौधरीको नाममा दर्ता गरिएको थियो ।

सार्वजनिक जग्गालाई गैरकानुनी रूपमा नक्कली जग्गाधनी खडा गरी चौधरीको नाममा दर्ता कायम गरिएपछि उक्त जग्गा बिक्रीसमेत गरिएको अख्तियारको अनुसन्धानबाट खुलेको छ ।

आयोगले भागमैन थरुनीको नाममा रहेका सम्बन्धित जग्गासहित थप सम्पत्ति जफत गरी पुनः नरसिंह भगवान मन्दिरकै नाममा कायम गर्न माग गरेको छ ।

झुटा सर्जमिन र नाता प्रमाणित

अख्तियारको अनुसन्धानअनुसार प्रतिवादीहरूले २०६४ जेठ ८ गते साविक सिंगिया गाविसबाट र २०६४ माघ ९ गते धरान नगरपालिका–१४ बाट झुटा सर्जमिन मुचुल्का तयार गरेका थिए ।

त्यसैका आधारमा नाता प्रमाणित प्रमाणपत्रसमेत बनाएर धरान नगरपालिकाले मालपोत कार्यालय, सुनसरीलाई जग्गा नामसारी गर्न सिफारिस गरेको आयोगको दाबी छ ।

मालपोत कार्यालय सुनसरीले २०६५ जेठ २१ गते उक्त जग्गा नामसारी गर्ने निर्णय गरेको अख्तियारले जनाएको छ ।

आयोगले सार्वजनिक तथा मन्दिरको नाममा रहेको जग्गा गैरकानुनी रूपमा व्यक्तिको नाममा ल्याई बिक्रीसमेत गरिएको भन्दै संलग्न सबैविरुद्ध भ्रष्टाचारसम्बन्धी कानुनी कारबाहीको माग गरेको छ ।

Originally published on abcnews.com.np.