काठमाडौं । सरकारी स्वामित्वको खाद्य व्यवस्था तथा व्यापार कम्पनी लिमिटेडले सिंहदरबार परिसरमा बिक्री कक्ष सञ्चालनमा ल्याएको छ। कम्पनीको सातौँ वार्षिकोत्सवको अवसर पारेर बिहीबारदेखि बिक्री कक्ष सञ्चालनमा ल्याइएको हो।

उद्योग, वाणिज्य तथा आपूर्तिमन्त्री गौरीकुमारी यादवले बिक्री कक्षको उद्घाटन गरिन्। बिक्री कक्षबाट सिंहदरबारमा कार्यरत राष्ट्रसेवक कर्मचारी तथा सेवाग्राहीले दैनिक उपभोग्य वस्तु सहज रूपमा खरिद गर्न सक्ने कम्पनीले जनाएको छ।

उद्घाटनपछि सञ्चारकर्मीसँग कुरा गर्दै मन्त्री यादवले आम उपभोक्तालाई सहुलियत मूल्यमा गुणस्तरीय खाद्यवस्तु उपलब्ध गराउन सरकार निरन्तर प्रयासरत रहेको बताइन्।

१४२ प्रकारका वस्तु बिक्रीमा

खाद्य व्यवस्था तथा व्यापार कम्पनीका विभागीय प्रबन्धक घनश्याम अर्यालका अनुसार सिंहदरबारस्थित बिक्री कक्षमा १४२ प्रकारका खाद्य तथा गैरखाद्य वस्तु बिक्रीका लागि राखिएका छन्।

उनका अनुसार बिक्री कक्ष सञ्चालन गर्नुको उद्देश्य उपभोक्तालाई सहज रूपमा गुणस्तरीय वस्तु उपलब्ध गराउनुका साथै नेपाली उत्पादनलाई प्राथमिकता दिनु र स्वदेशी किसान तथा उद्योगलाई बजारसँग जोड्नु हो।

४४ जिल्लाका १९३ स्थानमा सुपथ मूल्य पसल

कम्पनीले बिहीबारदेखि नै देशका ४४ जिल्लाका १९३ स्थानमा सहुलियत मूल्य पसल सञ्चालनमा ल्याएको छ।

यी पसलमा दैनिक उपभोग्य वस्तु खरिद गर्दा उपभोक्ताले प्रतिकिलो तथा प्रतिलिटर ५ रुपैयाँसम्म छुट पाउने कम्पनीले जनाएको छ।

कम्पनीले सेवा विस्तारसँगै स्वदेशी उत्पादनलाई प्राथमिकता दिँदै उपभोक्तालाई सहुलियत मूल्यमा आवश्यक वस्तु उपलब्ध गराउने नीति अघि बढाएको जनाएको छ।

Originally published on abcnews.com.np.