काठमाडौं । नेपाली कांग्रेसले पत्रकार किशोर श्रेष्ठलाई पक्राउ गरिएको घटनाप्रति आपत्ति जनाउँदै गैरकानुनी गिरफ्तारीको निन्दा गरेको छ।

कांग्रेस प्रवक्ता देवराज चालिसेले दोष निरुपणका लागि कानुनी तथा न्यायिक प्रक्रिया हुँदाहुँदै पत्रकारलाई त्रसित पार्ने उद्देश्यले गरिएको धरपकड दमनकारी भएको बताएका छन्।

उनले प्रेस काउन्सिलसहित कानुनी निकाय र प्रक्रियाहरू हुँदाहुँदै त्यसलाई बेवास्ता गरेर नागरिकको अभिव्यक्ति स्वतन्त्रता कुण्ठित गर्ने काम स्वीकार्य नहुने बताए।

“दोषको निरुपण गर्ने न्यायिक प्रक्रिया हुन्छ, प्रेस काउन्सिल छ, कानुनसम्मत प्रक्रियाहरू छन् । त्यो प्रक्रियालाई पर राखेर त्रसित पार्ने, नागरिक स्वतन्त्रता कुण्ठित गर्ने, प्रेसको घाँटी निमोठ्ने जुन किसिमको दमनकारी व्यवहार सत्ताबाट भएको छ, त्यो स्वीकार्य छैन,” चालिसेले भने।

कांग्रेसले वाक तथा प्रकाशन स्वतन्त्रताको पक्षमा आफू सदैव उभिँदै आएको उल्लेख गर्दै पत्रकार श्रेष्ठको गिरफ्तारीलाई गैरकानुनी भन्दै निन्दा गरेको उनले बताए।

सार्वजनिक लेखा समितिको घटनाप्रति पनि आपत्ति

कांग्रेसले सत्तारूढ सांसद खगेन्द्र सुनार र प्रहरी महानिरीक्षक (आईजीपी) बीच बुधबार सार्वजनिक लेखा समितिको बैठकमा भएको विवादप्रति पनि ध्यानाकर्षण जनाएको छ।

प्रवक्ता चालिसेका अनुसार समितिको बैठकमा सत्तारूढ सांसदबाट असंसदीय तथा अमर्यादित भाषा प्रयोग भएको भन्दै कांग्रेसले गम्भीर असहमति जनाएको छ।

“सदनमा अमर्यादित र अशोभनीय भाषालाई न्यायिक निकायबाट निरुपण गर्नुपर्नेमा जुन खालको व्यवहार देखिएको छ, त्यसले शोभा दिँदैन,” उनले भने।

कांग्रेसले आफ्ना सांसदहरूलाई लोकतन्त्रका उच्चतम मूल्य, मर्यादा र संसदीय आचरण कायम गर्न निर्देशन दिएको पनि चालिसेले जानकारी दिए।

रोल्पा पहिरोप्रति दुःख

कांग्रेसले रोल्पामा गएको पहिरोमा परी ज्यान गुमाएकाप्रति दुःख व्यक्त गर्दै बेपत्ताको खोजी तथा उद्धार कार्यलाई तीव्र बनाउन सरकारसँग माग गरेको छ।

प्रभावितलाई तत्काल राहत तथा आवश्यक सहयोग उपलब्ध गराउन पनि कांग्रेसले आग्रह गरेको छ।

केन्द्रीय समिति बैठक जारी

गत आइतबारदेखि सानेपामा जारी कांग्रेस केन्द्रीय कार्यसमिति बैठक शुक्रबारसम्म चल्ने प्रवक्ता चालिसेले जानकारी दिएका छन्। बैठकमा समसामयिक राजनीतिक तथा सांगठनिक विषयमा छलफल भइरहेको छ।

Originally published on abcnews.com.np.