काठमाडौं । नेपाली कांग्रेसका नेता मोहनबहादुर बस्नेतले पार्टी सभापति गगनकुमार थापा आगामी निर्वाचनमा उम्मेदवार नबने आफू पनि चुनाव नलड्ने घोषणा गरेका छन्।

कांग्रेस संस्थापनइतर पक्षको राष्ट्रिय भेलालाई सम्बोधन गर्दै बस्नेतले थापाले ५५ वर्षको उमेरमा राजनीति छाड्ने बताएको स्मरण गर्दै अब उक्त समय आउन तीन वर्षमात्र बाँकी रहेको बताए।

बस्नेतले आफूले यसअघि थापाको आफ्नै चुनाव क्षेत्र नभएको बताउँदै आएको र अहिले त्यो कुरा प्रमाणित भएको दाबी गरे। उनले सिन्धुपाल्चोकलाई आफूले एकलौटी कांग्रेसको आधार बनाएको भन्दै थापामाथि कटाक्षसमेत गरे।

“गगन थापाको कुनै चुनाव क्षेत्र छैन भनेको थिएँ, त्यो प्रमाणित भएको छ । सिन्धुपाल्चोक एकलौटी कांग्रेस बनाएर आएको हुँ,” बस्नेतले भने।

युवालाई नेतृत्व हस्तान्तरण गर्न तयार

बस्नेतले आफू अझै करिब २० वर्ष चुनाव लड्न सक्ने भए पनि नेतृत्वले युवालाई अवसर दिनुपर्ने बताए। थापाले सक्रिय राजनीति छाड्ने निर्णय गरे आफूले पनि चुनाव नलड्ने उनको भनाइ थियो।

“म छाड्न तयार छु, तपाईं पनि छाड्नुहोस् । अब राजनीति गर्दिनँ, युवालाई जिम्मा लगाउँछु भन्नुहोस्, म पनि तपाईंजस्तै लड्दै आएको हुँ, तपाईंले लड्नुभएन भने म पनि कुनै चुनाव लड्दिनँ,” उनले भने।

उनले आफूहरूलाई आलोचक पक्षले ‘खरानी दस्ता’ भन्ने गरेको प्रसंग निकाल्दै पूर्वसभापति शेरबहादुर देउवा स्वदेश फर्किँदा देखिएको जनसमर्थनले त्यसको जवाफ दिएको दाबी गरे।

बस्नेतले विशेष महाधिवेशन पक्षधरप्रति व्यंग्य गर्दै भने, “हिजो हामीलाई विशेष महाधिवेशन पक्षले खरानी दस्ता भन्नुभएको थियो, हिजोको उपस्थितिले खरानी दस्ता चाहिँ विशेष महाधिवेशन भैसक्नुभएको छ।”

Originally published on abcnews.com.np.