काठमाडौँ । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले सार्वजनिक लेखा समितिको बैठकमा दिएको अभिव्यक्तिप्रति गृहमन्त्री सुधन गुरुङले आपत्ति जनाएका छन्।

शुक्रबार कानुन, न्याय तथा मानव अधिकार समितिको बैठकमा बोल्दै गृहमन्त्री गुरुङले एउटा उजुरीकै आधारमा कसैलाई दोषी ठहर गर्न नमिल्ने बताए।

“कसैलाई एउटा उजुरीको भरमा हामी न्यायाधीश बन्न मिल्दैन। मेरो गैरउपस्थितिमा हाम्रो सचिवज्यू र प्रहरी प्रमुखज्यूहरूलाई जुन व्यवहारले एउटा समितिले प्रस्तुत गर्नुभयो, त्यसमा गृहमन्त्रीको ध्यानाकर्षण भएको छ। दिस इज नट राइट, दिस इज नट गुड,” उनले भने।

उजुरीकै आधारमा चरित्र हत्या गर्न नहुने

गृहमन्त्री गुरुङले जोसुकैले आरोप लगाउन सक्ने भए पनि आरोप प्रमाणित नभएसम्म व्यक्तिलाई दोषीका रूपमा प्रस्तुत गर्न नहुने बताए।

उनले यस्ता विषयमा कानुनी व्यवस्था थप स्पष्ट बनाउनुपर्ने आवश्यकता रहेको पनि बताए। “आरोप लगाउन जोसुकैले पनि सक्यो, तर त्यो पुष्टि नभएसम्म दोषी करार गरेर समिति मार्फत यस्तो गर्नु राम्रो होइन,” उनले भने।

गृह मन्त्रालयका कर्मचारी तथा प्रहरी नेतृत्वले गरिरहेको कामप्रति आफू जानकार रहेको बताउँदै गुरुङले उनीहरूको कार्यसम्पादनको बचाउ गरे। विशेषगरी प्रहरी प्रमुखलगायत अधिकारीहरू सरकारको गतिअनुसार काम गर्न दिनरात खटिरहेको उनले बताए।

बुधबारको घटनाप्रति असन्तुष्टि

बुधबार सार्वजनिक लेखा समितिको बैठकमा आफू उपस्थित नभएको उल्लेख गर्दै गुरुङले सो बैठकमा भएको घटनाप्रति आफूलाई दुःख लागेको बताए। शुक्रबार कानुन समितिको बैठकमा उक्त विषयमा आफ्नो धारणा राख्ने अवसर पाएको उनले बताए।

बैठकमा प्रहरी प्रमुख दानबहादुर कार्की पनि उपस्थित थिए।

यसअघि सार्वजनिक लेखा समितिको बैठकमा सांसद खगेन्द्र सुनारले तत्कालीन गृहमन्त्री, गृहसचिव तथा दुवै प्रहरी महानिरीक्षकसहितका अधिकारीलाई बेनामे उजुरीका आधारमा निलम्बन गरी कारबाही अघि बढाउनुपर्ने धारणा राखेका थिए।

सुनारको उक्त अभिव्यक्तिको रास्वपासहित विभिन्न दलका सांसदहरूले खण्डन गरेका थिए। सोही बैठकमा प्रहरी प्रमुख कार्कीले जवाफ दिइरहेका बेला सुनार बैठकबाट बाहिरिएका थिए।

Originally published on abcnews.com.np.