काठमाडौं । सभामुख डोलप्रसाद अर्याल र प्रहरी महानिरीक्षक (आईजीपी) दानबहादुर कार्कीबीच शुक्रबार भेटवार्ता भएको छ। सिंहदरबारस्थित सभामुखको कार्यकक्षमा भएको भेटमा बुधबार प्रतिनिधिसभाको सार्वजनिक लेखा समितिको बैठकमा आईजीपी कार्की र राष्ट्रिय स्वतन्त्र पार्टी (रास्वपा)का सांसद खगेन्द्र सुनारबीच भएको भनाभनबारे छलफल भएको हो।

भेटका क्रममा आईजीपी कार्कीले लेखा समितिको बैठकमा भएको घटनाले आफूलाई मात्र नभई समग्र प्रहरी संगठनलाई असर पुगेको बताएका थिए। घटनाका कारण प्रहरी संगठनका तल्लो तहमा कार्यरत कर्मचारीको मनोबलसमेत प्रभावित भएको उनको भनाइ थियो।

‘जुन घटना भयो, त्यो एउटा व्यक्तिमाथिको मात्रै होइन। त्यसले संस्थालाई नै असर गरेको छ। हाम्रो संगठनका तल्ला तहका कर्मचारीको पनि मनोबल गिरेको छ,’ कार्कीले भनेको स्रोतलाई उद्धृत गर्दै जनाएको छ।

कार्कीले घटनाबारे सभामुखको धारणा समेत मागेका थिए। जवाफमा सभामुख अर्यालले आफूले लेखा समिति सभापति भरतबहादुर खड्का र सदस्य बबिता मिश्रसँग घटनाबारे जानकारी लिएको बताएका थिए।

सभामुख अर्यालले प्रहरी संगठनलाई उच्च मनोबलका साथ काम गर्न आग्रह गर्दै आफूहरूको साथ रहेको बताएका थिए।

‘म पनि आफ्नो काम गरिरहेको छु। यहाँहरू उच्च मनोबलका साथ काम गर्नुस्,’ सभामुखले भने, ‘एक प्रतिशत पनि मनोबल नघटाउनुस्। हामी तपाईँहरूको साथमा छौँ।’

गृहमन्त्रीले गरे आईजीपीको बचाउ

यसअघि गृहमन्त्री सुधन गुरुङले पनि आईजीपी कार्कीको बचाउ गरेका थिए। आफू अनुपस्थित रहेको बैठकमा लेखा समितिबाट भएको व्यवहारप्रति उनले असन्तुष्टि जनाएका थिए।

गृहमन्त्री गुरुङले उजुरीकै आधारमा कसैलाई दोषी ठहर गर्न नमिल्ने धारणा राखे। ‘उजुरीको भरमा हामी न्यायाधीश बन्न मिल्दैन। आरोप जो कोहीलाई लाग्यो भन्दैमा चरित्रहत्या गर्न पाइँदैन। यसमा गृह मन्त्रालयकै ध्यानाकर्षण भएको छ,’ उनले भने।

आरोप जोसुकैले लगाउन सक्ने भएकाले त्यसको पुष्टि नभएसम्म कसैलाई दोषी ठहर गर्न नमिल्ने उनको भनाइ थियो।

निर्वाचन प्रहरीको पोसाकसम्बन्धी उजुरीमा विवाद

बुधबार बसेको सार्वजनिक लेखा समितिको बैठकमा निर्वाचन प्रहरीका लागि खरिद गरिएको पोसाकमा अनियमितता भएको उजुरीमाथि छलफल भएको थियो। सोही क्रममा आईजीपी कार्की र सांसद सुनारबीच भनाभन भएको थियो।

बैठकमा बोल्ने क्रममा ध्यान नपुर्‍याएको भन्दै रास्वपाले सांसद सुनारलाई सचेत गराउने तयारी गरेको स्रोतले जनाएको छ।

Originally published on abcnews.com.np.