काठमाडौं । राजधानीको भृकुटीमण्डपमा जारी ‘नाइमा नेपाल मोबिलिटी एक्स्पो २०२६’ मा दर्शकको चासो बढेपछि आयोजकले शनिबार र आइतबारका लागि विशेष तयारी गरेको छ ।

नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा) ले बिदाका दिन धेरै दर्शक आउने अनुमान गर्दै पार्किङलगायत व्यवस्थापनलाई थप व्यवस्थित बनाएको जनाएको छ ।

नाइमाका कार्यकारी निर्देशक राजकुमार दुलालले अवलोकनकर्ताको सुविधाका लागि पार्किङ स्थलको विशेष व्यवस्थापन गरिएको जानकारी दिनुभयो । उहाँका अनुसार एक्स्पोको सुरुवाती चार दिनमा भृकुटीमण्डप क्षेत्रका खुला स्थान र नेपाल पुलिस क्लब भवनका दुवै तला भरिए पनि पार्किङको समस्या देखिएको थियो ।

एक्स्पोको व्यवस्थापकीय साझेदार मिडिया स्पेस सोलुसन्सका प्रबन्ध निर्देशक श्रीजल भट्टराईका अनुसार एक्स्पो सुरु हुनुअघि नै भृकुटीमण्डपको गेटमा दर्शकको लाइन लाग्ने गरेको छ ।

तेस्रो दिनसम्ममा एक लाख आठ हजारभन्दा बढीले एक्स्पोको अवलोकन गरिसकेका छन् । उद्घाटनका दिन साउन २६ गते २९ हजार, दोस्रो दिन २६ हजार र तेस्रो दिन २२ हजारले एक्स्पो अवलोकन गरेका थिए । चौथो दिन भने ३१ हजारभन्दा बढी दर्शक पुगेका आयोजकले जनाएको छ ।

आयोजकले दैनिक औसत २५ हजार तथा एक्स्पो अवधिभर करिब डेढ लाख दर्शक आउने अपेक्षा गरेको छ ।

५५ भन्दा बढी ब्रान्डका सवारी

एक्स्पोमा ५५ भन्दा बढी ब्रान्डका सवारीसाधन प्रदर्शनीमा राखिएका छन् । विभिन्न कम्पनीले नयाँ मोडल सार्वजनिक गर्दै दर्शकलाई आकर्षित गरिरहेका छन् ।

दुईपाङ्ग्रे सवारीसाधनमा समेत दर्शकको उल्लेख्य भीड देखिएको छ । विशेषगरी महँगा ब्रान्डका मोटरसाइकल तथा स्कुटरमा युवाको आकर्षण बढेको आयोजकले जनाएको छ ।

दर्शकले सवारीसाधनको ब्याट्री क्षमता, मोटर, रेन्ज, बिक्रीपछिको सेवा, ब्याट्रीको वारेन्टी तथा ग्यारेन्टी र रिसेल भ्यालुलगायत विषयमा चासो राखेका छन् ।

ग्राहक आकर्षित गर्न कम्पनीहरूले मूल्यमा छुट, एक वर्षको बिमा, सवारी कर छुट, निःशुल्क सर्भिसिङ तथा सहुलियत ब्याजदरमा कर्जालगायत सुविधा उपलब्ध गराएका छन् ।

५२ नयाँ मोडल सार्वजनिक

एक्स्पोमा हालसम्म विभिन्न ब्रान्डले ५२ वटा नयाँ मोडलका सवारीसाधन सार्वजनिक गरिसकेका छन् ।

नेपालमा पहिलोपटक प्रवेश गरेका ब्रान्डदेखि नयाँ विद्युतीय कार, ई–स्कुटर तथा विद्युतीय व्यावसायिक सवारीसाधन एक्स्पोका मुख्य आकर्षण बनेका छन् ।

विभिन्न बैंक तथा वित्तीय संस्था र बिमा कम्पनीले समेत सवारी खरिदका लागि विशेष अफर तथा सहुलियतपूर्ण कर्जा उपलब्ध गराइरहेका छन् ।

नेपालमा दिगो, हरित तथा प्रविधिमैत्री यातायात प्रणालीलाई प्रवर्धन गर्ने उद्देश्यले आयोजना गरिएको एक्स्पो साउन ३१ गतेसम्म सञ्चालन हुनेछ ।

Originally published on abcnews.com.np.