रौतहट । भारतको झारखण्डमा तीर्थयात्री सवार बस दुर्घटना हुँदा रौतहटका तीन जनाको मृत्यु भएको छ । गरुडा नगरपालिका–६ पोठियाहीबाट बोलबम यात्राका लागि भारत गएका तीर्थयात्री सवार बस झारखण्डको कोडरमा जिल्लामा दुर्घटनामा परेको हो ।

भारतीय सञ्चारमाध्यमका अनुसार दुर्घटनामा पोठियाहीका ६० वर्षीय नवल जयसवाल, उनकी श्रीमती र १० वर्षीय शिवम महतोको मृत्यु भएको छ । दुर्घटनामा अन्य तीर्थयात्रीसमेत घाइते भएका छन् ।

स्थानीयका अनुसार पोठियाहीबाट गत आइतबार ना.६ ख १५५४ नम्बरको बसमा ४५ जना तीर्थयात्री भारतको बैद्यनाथ धामका लागि प्रस्थान गरेका थिए । बासुकीनाथको दर्शन सकेर देवघर हुँदै राजगीरतर्फ जाने क्रममा शुक्रबार बिहान करिब ३ बजे झारखण्डको कोडरमा जिल्लास्थित सतगावाँ थाना क्षेत्रमा बस र मालवाहक ट्रक आपसमा ठोक्किएका थिए ।

दुर्घटनामा बसको अगाडिको भाग पूर्ण रूपमा क्षतिग्रस्त भएको बताइएको छ । दुर्घटनालगत्तै सतगावाँ प्रहरी घटनास्थलमा पुगेको थियो । प्रहरीले घाइते तीर्थयात्रीको उद्धार गरी नजिकका अस्पतालमा पठाएको जनाएको छ ।

घाइतेको संख्या र उनीहरूको अवस्थाबारे विस्तृत विवरण आउन बाँकी छ । मृतक तथा घाइतेमध्ये अधिकांश पोठियाहीकै बासिन्दा रहेको स्थानीयले बताएका छन् ।

सतगावाँ थाना प्रमुख बब्लु सिंहका अनुसार प्रारम्भिक अनुसन्धानमा बस चालकलाई अत्यधिक निद्रा लागेको हुनसक्ने देखिएको छ । दुर्घटनाको वास्तविक कारणबारे थप अनुसन्धान भइरहेको भारतीय प्रहरीले जनाएको छ ।

दुर्घटनाको खबर फैलिएपछि पोठियाही गाउँ शोकमा डुबेको छ । मृतक तथा घाइतेका आफन्त शुक्रबार बिहानै चारवटा सवारीसाधन रिजर्भ गरेर भारततर्फ गएको स्थानीयले बताएका छन् । दुर्घटनाको खबरसँगै गाउँमा रुवाबासी चलेको छ ।

जिल्ला प्रहरी कार्यालय रौतहटका प्रवक्ता एवं प्रहरी नायब उपरीक्षक वसन्त गौतमले पनि घटनाबारे भारतीय सञ्चारमाध्यमबाट जानकारी प्राप्त भएको बताएका छन् । घटनाको विस्तृत विवरण बुझ्ने प्रयास भइरहेको उनले जानकारी दिए ।

बैद्यनाथ धाम दर्शनका लागि गएका थिए

तीर्थयात्रीहरू भगवान शिवको पवित्र तीर्थस्थल बैद्यनाथ धामको दर्शनका लागि भारत गएका थिए । बोलबम यात्रा हिन्दू धर्मावलम्बीका लागि महत्वपूर्ण धार्मिक यात्रा मानिन्छ ।

Originally published on abcnews.com.np.