काठमाडौं । आज शनिबार देशभर बदली रही विभिन्न स्थानमा मेघगर्जन र चट्याङसहित वर्षाको सम्भावना रहेको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार बागमती, गण्डकी र कर्णालीका पहाडी भूभाग तथा लुम्बिनीको पहाडी र तराई क्षेत्रमा केही स्थानमा भारी वर्षा हुनसक्ने सम्भावना छ।

महाशाखाका अनुसार हाल मनसुनको न्यूनचापीय रेखा पूर्वतर्फ सरदर स्थान आसपास तथा पश्चिमतर्फ सरदर स्थानभन्दा उत्तरमा नेपालनजिक रहेको छ।

शनिबार बिहान कोसी, बागमती, कर्णाली र सुदूरपश्चिम प्रदेश तथा गण्डकी र लुम्बिनीका हिमाली एवं पहाडी क्षेत्रमा सामान्य बदली रहेको छ। मधेस तथा गण्डकी र लुम्बिनीका तराई क्षेत्रमा आंशिक बदली छ। गण्डकी र कर्णालीका पहाडी भूभागका एक–दुई स्थानमा मध्यम वर्षा भइरहेको छ।

दिउँसो कहाँ-कहाँ वर्षा?

महाशाखाका अनुसार दिउँसो देशभर सामान्यतया बदली रहनेछ। हिमाली र पहाडी भूभागका केही स्थानमा मेघगर्जन तथा चट्याङसहित मध्यम वर्षा र हिमपात हुने सम्भावना छ।

लुम्बिनी र सुदूरपश्चिमका तराई भूभागका केही स्थान तथा मधेस, कोसी, बागमती र गण्डकीका तराई भूभागका थोरै स्थानमा पनि मेघगर्जन र चट्याङसहित मध्यम वर्षाको सम्भावना छ।

बागमती, गण्डकी र कर्णालीका पहाडी भूभाग तथा लुम्बिनीका पहाडी र तराई क्षेत्रमा एक–दुई स्थानमा भारी वर्षा हुनसक्ने महाशाखाले जनाएको छ।

राति पनि वर्षाको सम्भावना

राति पनि देशभर सामान्यतया बदली रहनेछ। हिमाली र पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

बागमती, गण्डकी, लुम्बिनी र सुदूरपश्चिमका तराईका थोरै स्थान तथा मधेस र कोसीका तराईका एक–दुई स्थानमा मध्यम वर्षा हुनसक्नेछ। बागमती, गण्डकी र कर्णालीका पहाडी भूभागका एक–दुई स्थानमा भारी वर्षाको सम्भावना रहेको छ।

काठमाडौँमा अपराह्न–साँझ वर्षा

काठमाडौँ उपत्यकामा पनि आज पानी पर्ने सम्भावना रहेको मौसमविद् रोजन लामिछानेले बताएका छन्।

उनका अनुसार अपराह्नदेखि साँझसम्म उपत्यकाका केही स्थानमा हल्कादेखि मध्यम वर्षा हुनसक्छ। “त्यस्तो धेरै वर्षाको सम्भावना छैन, कतै हल्का, कतै मध्यम वर्षा हुने सम्भावना छ,” उनले बताएका छन्।

त्यसअघि भने काठमाडौँ उपत्यकाको मौसम घाम लाग्ने र बादल लाग्ने क्रममै रहने मौसमविद् लामिछानेको भनाइ छ।

Originally published on abcnews.com.np.