मुगु । मुगुमकार्मारोङ गाउँपालिकाका स्थानीयवासी जिल्ला सदरमुकाम गमगढी आउजाउ गर्दा जोखिमपूर्ण गोरेटो बाटोमा भगवान्को नाम जपेर यात्रा गर्न बाध्य छन्।

सडक सञ्जालसँग नजोडिएको गाउँपालिकामा पुग्ने मुख्य बाटो साँघुरो, भिरालो र कडा चट्टानबीचबाट जाने भएकाले स्थानीयवासी, कर्मचारी तथा सेवाग्राहीले ज्यानको जोखिम मोलेर आवतजावत गर्नुपर्ने अवस्था छ।

मुगुमकार्मारोङ गाउँपालिका–६ रिउसका टासी कामी दैनिक ज्यालादारी काम गर्छन्। गाडी पुगेको स्थान छायलसम्म भारी बोकेर सामान पुर्‍याउन आउँदा साँघुरो र अप्ठ्यारो बाटोमा हरेक दिन त्रासमा यात्रा गर्नुपर्ने उनी बताउँछन्। “बेलुका घर पुगिन्छ कि पुगिँदैन भन्ने डरले बाटोमा भगवान्को नाम जपेर हिँड्नुपर्ने अवस्था छ,” उनले भने।

पहिरो र ढुंगा खस्ने जोखिम

गाउँपालिका पुग्ने मुख्य गोरेटो बाटो कर्णाली नदीको किनार हुँदै अग्ला भिर र कडा चट्टानबीचबाट जानुपर्छ। सडक सुविधा नहुँदा स्थानीयवासी, कर्मचारी तथा सेवाग्राही सबैले यही जोखिमपूर्ण बाटो प्रयोग गर्नुपर्ने बाध्यता छ।

मुगुमकार्मारोङ–२ का स्थानीय साङ्मगुम लामाका अनुसार बर्खायाममा पहिरो खस्ने, ढुंगा झर्ने तथा कतिपय स्थानमा गोरेटो बाटो नै बगाउने भएकाले जोखिम झनै बढ्ने गरेको छ।

गाउँपालिकाको स्वास्थ्य शाखाका प्रमुख बलिराज बुढाका अनुसार साँघुरो बाटो, उकाली–ओराली र पहिरोका कारण कर्मचारी तथा नागरिक जोखिम मोलेर यात्रा गर्न बाध्य छन्। “कुन बेला के हुन्छ भन्ने डरैडरमा यात्रा गर्नुपर्छ। गाउँपालिका अहिलेसम्म सडक सञ्जालमा नजोडिँदा स्थानीयदेखि कर्मचारी र विद्यार्थी सबैले जोखिम मोलेर हिँड्नुपर्ने अवस्था छ,” उनले भने।

कडा चट्टानले सडक निर्माणमा समस्या

मुगुमकार्मारोङ–८ स्थित माग्रीडाँडामा कडा चट्टानका कारण यात्रा थप जोखिमपूर्ण बनेको छ। करिब एक घण्टाको उकालो साँघुरो बाटो पार गर्नुपर्ने भएकाले यात्रुहरू त्रसित हुने गरेका छन्।

माग्रीडाँडाको कडा चट्टान फोडेर बाटो विस्तार गर्न सके गाउँपालिकासम्मको यात्रा सहज हुने भए पनि चट्टानका कारण सडक निर्माणमा समस्या भइरहेको बुढाले बताए।

केन्द्रसम्म सडक जोडिन सकेन

मुगुमकार्मारोङ गाउँपालिकाका अध्यक्ष छिरिङ क्याप्ने लामाका अनुसार गाउँपालिका अझै केन्द्र सरकारको सडक सञ्जालमा जोडिन सकेको छैन।

सडक सुविधा नहुँदा बर्खायाममा गाउँपालिका केन्द्र पुलुबजारसम्मै पहिरो र ढुंगा खस्ने जोखिम रहने उनले बताए। “साउनदेखि भदौको दोस्रो सातासम्म तल कर्णाली नदीको बहाव बढ्ने र माथिबाट ढुंगा खस्ने डर हुन्छ। त्यसैले यहाँका नागरिकले निकै सास्ती र त्रासबीच आवतजावत गर्नुपर्ने बाध्यता छ,” अध्यक्ष लामाले भने।

Originally published on abcnews.com.np.