काठमाडौं । नेपाली कांग्रेसका नेता डा. शशांक कोइरालाले पार्टीको १५औँ महाधिवेशन पूर्वसभापति शेरबहादुर देउवाको नेतृत्वमा हुने दाबी गरेका छन्।

राष्ट्रिय भेलास्थलमा सञ्चारकर्मीसँग कुरा गर्दै कोइरालाले कांग्रेसमा विभाजनको सम्भावना कम रहेको बताए। आफू भने छुट्टै पार्टी गठन गर्ने पक्षमा नरहेको उनको स्पष्टोक्ति छ।

‘हामीलाई समयअनुसार परिमार्जित गर्दै जानुपर्छ, यस्तै भेलाले गर्ने हो। विभाजन आउने सम्भावना कम छ। आयो भने सिचौँला। तर अर्को पार्टी खोल्ने पक्षमा म छैन,’ कोइरालाले भने।

भेला आयोजक समितिका संयोजकसमेत रहेका कोइरालाले १५औँ महाधिवेशन देउवाको नेतृत्वमा हुने दाबी गरे। देउवाको नेतृत्वमा महाधिवेशन हुन नसक्ने अवस्था आए छलफल गरेर त्यसबारे निर्णय गरिने उनको भनाइ छ।

उनले कांग्रेसलाई समयअनुकूल सुधार र परिमार्जन गर्दै अघि बढाउनुपर्नेमा जोड दिएका छन्।

Originally published on abcnews.com.np.