काठमाडौं । बेल्जियमको इस्ट फ्ल्यान्डर्समा घर मर्मतका क्रममा मजदुरहरूले भित्ताभित्र करिब ९० लाख युरो (करिब १ अर्ब ५८ करोड ७० लाख रुपैयाँ) बराबरको सुन फेला पारेका छन्। स्थानीय सञ्चारमाध्यमका अनुसार ढलको पाइप बिछ्याउन ड्रिलिङ गर्ने क्रममा मजदुरहरूले ठूलो परिमाणमा सुनका सिक्का र सुनका टुक्रा फेला पारेका हुन्।

सुन भेटिएपछि यसको वास्तविक मालिक को हो र कानुनी रूपमा कसको स्वामित्वमा जाने भन्ने विषयमा अनुसन्धान सुरु भएको छ। प्रहरीले निर्माणस्थलमा थप खजाना खोज्न मानिसहरूलाई रोक लगाएको छ। घरमा पूर्ण रूपमा खोजतलास गरी भेटिएको सुन सुरक्षित स्थानमा राखिएको प्रहरीले जनाएको छ।

सुन फेला पार्ने मजदुरमध्ये १८ वर्षीय कोबे नामका विद्यार्थी पनि छन्। गर्मीको बिदामा अतिरिक्त आम्दानीका लागि मजदुरी गरिरहेका उनले सुरुमा आफूहरूले युरोका सिक्का भेटिएको ठानेको बताए। पछि सुनको टुक्रासमेत भेटिएपछि घटना असाधारण भएको थाहा पाएको उनको भनाइ छ। मजदुरहरूले तत्काल प्रहरीलाई खबर गरेका थिए।

साइट म्यानेजर मारियोका अनुसार सुनको परिमाण यति ठूलो थियो कि त्यसलाई लुकाउन सम्भव थिएन। उनका अनुसार सुन लुकाउनु चोरीसरह हुने भएकाले प्रहरीलाई खबर गर्नु नै उचित निर्णय थियो।

सुन भेटिएको भवन हाल सीएडब्ल्यू ओस्ट–भ्लान्डेरेन नामक सामाजिक तथा कल्याणकारी संस्थाको स्वामित्वमा रहेको छ। संस्थाका निर्देशक गीर्ट हिलर्टले खजाना भेटिएको खबरले आफूहरू आश्चर्यचकित भएको बताएका छन्। वास्तविक मालिक फेला नपरेमा भविष्यमा उक्त रकम संस्थाको सामाजिक कार्यमा उपयोग गर्न सकिने आशा उनले व्यक्त गरेका छन्।

बेल्जियमको कानुनी व्यवस्थाअनुसार वास्तविक मालिकले पाँच वर्षभित्र आफ्नो स्वामित्व दाबी गर्न सक्नेछन्। मालिक पत्ता नलागेमा अरूको जमिनमा लुकाइएको खजाना फेला पार्ने व्यक्ति र जमिनको मालिकबीच बाँडिन सक्ने कानुनी व्यवस्था रहेको स्थानीय अधिकारीहरूले बताएका छन्।

तर खजाना कुनै आपराधिक गतिविधिसँग सम्बन्धित नरहेको पुष्टि हुनुपर्नेछ। त्यसैले अहिले मजदुरहरू र भवनको स्वामित्वमा रहेको संस्थाले १ हजार ८२३ दिनसम्म वास्तविक मालिक दाबी गर्न कोही आउँछ कि आउँदैन भन्ने प्रतीक्षा गर्नुपर्ने भएको छ।

Originally published on abcnews.com.np.