काभ्रेपलाञ्चोक । बीपी राजमार्गको प्रवेशबिन्दु धुलिखेलदेखि नमोबुद्धको दाप्चा पुलसम्मको सडकखण्ड विस्तार गरी मुख्य कालोपत्र भाग १० मिटर चौडा बनाइने भएको छ।

डिभिजन सडक कार्यालय भक्तपुरका अनुसार हाल औसतमा करिब ५.५ मिटर चौडाइ रहेको उक्त सडकखण्डलाई करिब २० किलोमिटर दूरीमा विस्तार गर्न लागिएको हो। सडक विस्तारका लागि विस्तृत परियोजना प्रतिवेदन (डीपीआर) तयार भइसकेको कार्यालयले जनाएको छ।

डिभिजन सडक कार्यालय भक्तपुरका प्रमुख सिनियर डिभिजनल इन्जिनियर सुमन योगेशका अनुसार सडक विस्तारका लागि प्रारम्भिक वातावरणीय परीक्षण प्रतिवेदन तयार गर्ने कामसमेत अघि बढिरहेको छ।

करिब ३ अर्ब ८० करोड खर्च हुने

डीपीआरअनुसार धुलिखेल–दाप्चा सडक विस्तारमा अनुमानित ३ अर्ब ७९ करोड ७८ लाख रुपैयाँ खर्च हुने देखिएको छ।

कार्यालयले प्रतिकिलोमिटर सडक कालोपत्र गर्न मात्रै करिब १८ करोड ५ लाख रुपैयाँ खर्च हुने अनुमान गरेको छ।

सडक विस्तारका क्रममा दायाँ–बायाँ १५ मिटरसम्म पर्ने संरचना तथा जग्गाको मुआब्जा वितरणसमेत भइसकेको कार्यालयले जनाएको छ। विस्तार हुने सडकखण्ड धुलिखेल, पाँचखाल, पनौती र नमोबुद्ध नगरपालिकाभित्र पर्दछ।

बीपी राजमार्ग पुनर्निर्माण पनि तीव्र

यसैबीच, गत वर्षको बाढीपहिरोबाट क्षतिग्रस्त बीपी राजमार्गको पुनर्निर्माणको काम पनि अघि बढिरहेको छ।

२०८१ असोजमा आएको बाढीपहिरोका कारण भकुन्डेबेंसीदेखि नेपालथोकसम्म करिब ३० किलोमिटर सडकखण्डमा ठूलो क्षति पुगेको थियो। रोशी खोलामा अस्थायी डाइभर्सन निर्माण गरी यातायात सञ्चालन गरिए पनि क्षतिग्रस्त खण्डमा अहिले स्थायी पुनर्निर्माणको काम भइरहेको कार्यालयले जनाएको छ।

पुनर्निर्माणका लागि काभ्रेपलाञ्चोकतर्फ तीन र सिन्धुलीतर्फ एक गरी चारवटा प्याकेजमा ठेक्का सम्झौता गरिएको छ।

काभ्रेपलाञ्चोकतर्फका तीन खण्डका लागि करिब ७ अर्ब ५० करोड रुपैयाँ र सिन्धुलीतर्फको एक खण्डका लागि करिब १ अर्ब रुपैयाँ स्रोत सुनिश्चित गरिएको छ।

जापानी सहयोगमा बनेको रणनीतिक राजमार्ग

धुलिखेल–सिन्धुली–बर्दिबास जोड्ने बीपी राजमार्ग नेपालको पूर्वी तथा मध्य पहाडी क्षेत्रलाई राजधानीसँग जोड्ने महत्वपूर्ण सडकमार्ग हो।

जापान सरकारको अनुदान सहयोगमा आर्थिक वर्ष २०५३/५४ देखि निर्माण सुरु भएको १६० किलोमिटर लामो बीपी राजमार्ग निर्माण सम्पन्न भएपछि २०७२ असार १८ गते जापान सरकारले नेपाल सरकारलाई औपचारिक रूपमा हस्तान्तरण गरेको थियो।

अब धुलिखेलदेखि दाप्चासम्मको सडक फराकिलो बनाउने योजना र बाढीपहिरोबाट क्षतिग्रस्त खण्डको पुनर्निर्माणले बीपी राजमार्गको क्षमता, सुरक्षा र दीर्घकालीन सञ्चालनमा सुधार ल्याउने अपेक्षा गरिएको छ।

Originally published on abcnews.com.np.