काठमाडौं । नेपालका लागि युरोपेली संघ (ईयू)की राजदूत भेरोनिक लोरेन्जोले मंगलबार परराष्ट्रमन्त्री शिशिर खनालसँग बिदाइ भेट गरेकी छन्।

परराष्ट्र मन्त्रालयमा भएको भेटमा नेपाल–ईयू सम्बन्ध, आपसी हित र चासोका विभिन्न विषयमा छलफल भएको मन्त्रालयले जनाएको छ।

भेटका क्रममा परराष्ट्रमन्त्री खनालले राजदूत लोरेन्जोको खुलापन, इमानदारी र सहयोगका लागि धन्यवाद दिँदै नेपाल तथा परराष्ट्र मन्त्रालयप्रति उनले देखाएको सहयोगको प्रशंसा गरे।

राजदूत लोरेन्जोले हिमाल तथा पानीसम्बन्धी एजेन्डामा नेपालसँग सहकार्य गर्न ईयू इच्छुक रहेको बताइन्। जवाफमा मन्त्री खनालले हिमालसम्बन्धी विषय नेपाल सरकारको प्राथमिकतामा रहेको उल्लेख गर्दै सगरमाथा संवादको दोस्रो संस्करण आगामी वर्ष आयोजना हुने जानकारी दिए।

सुरक्षित आप्रवासनमा सहकार्य

भेटमा सुरक्षित, व्यवस्थित र मर्यादित आप्रवासनका विषयमा पनि छलफल भएको छ। राजदूत लोरेन्जोले यस क्षेत्रमा नेपालसँग सहकार्य गर्ने ईयूको योजना रहेको बताइन्।

मन्त्री खनालले ईयूको प्रस्तावको स्वागत गर्दै थप अध्ययन र विचारका लागि विस्तृत जानकारी उपलब्ध गराउन आग्रह गरे। उनले सुरक्षित तथा मर्यादित आप्रवासन नेपालका लागि प्राथमिकताको विषय रहेको र विदेशमा रहेका नेपाली डायस्पोराको संरक्षणमा सरकार गम्भीर रहेको बताए।

त्यस्तै, नेपाल अल्पविकसित मुलुक (एलडीसी)बाट स्तरोन्नति हुने प्रक्रियामा देखिएको स्थगनका विषयमा पनि छलफल भएको थियो। राजदूत लोरेन्जोले नेपालले ठोस कार्ययोजना र आवश्यक विवरण प्रस्तुत गरेपछि ईयूबाट सहयोग हुने बताइन्।

कला र सांस्कृतिक सहकार्य

भेटमा नेपाली कला, संस्कृति तथा सभ्यताको प्रवर्द्धन, खुलापन र अभिव्यक्ति स्वतन्त्रताका विषयमा समेत विचार आदानप्रदान भएको थियो।

राजदूत लोरेन्जोले नेवा कला प्रदर्शनीसम्बन्धी कार्यक्रमका लागि परराष्ट्र मन्त्रालयको सहयोगको आग्रह गरिन्। मन्त्री खनालले नेपालको सांस्कृतिक सम्पदाको प्रवर्द्धनका लागि सरकारको निरन्तर सहयोग र प्रतिबद्धता रहने बताएका छन्।

Originally published on abcnews.com.np.