काठमाडौं । नेपाली कांग्रेसका सुदूरपश्चिम प्रदेश सभा सदस्य प्रकाशबहादुर देउवा सांसद पदबाट पदमुक्त भएका छन्।

प्रदेश सभा सचिवालयले तयार गरेको पद रिक्तसम्बन्धी टिप्पणी आदेशलाई मंगलबार सभामुख भीमबहादुर भण्डारीले स्वीकृत गरेपछि देउवाको प्रदेश सभा सदस्य पद रिक्त भएको हो।

प्रदेश सभा सचिवालयका सूचना अधिकारी युवराज जैसीका अनुसार देउवा सभालाई पूर्वसूचना नदिई लगातार १० भन्दा बढी बैठकमा अनुपस्थित भएपछि संवैधानिक व्यवस्थाअनुसार पदमुक्त गरिएको हो।

सभामुख भण्डारीले बुधबार बस्ने प्रदेश सभा बैठकमा देउवाको पद रिक्त भएको विषयमा औपचारिक जानकारी गराउनेछन्। त्यसपछि राजपत्रमा सूचना प्रकाशित गरी निर्वाचन आयोगलाई समेत जानकारी गराइने प्रदेश सभा सचिवालयले जनाएको छ।

११ महिनादेखि अमेरिका

गत वर्ष भएको जेनजी आन्दोलनपछि भदौ २८ गते व्यक्तिगत कामका लागि अमेरिका गएका देउवा त्यसयता नेपाल फर्किएका छैनन्।

स्वास्थ्यमा समस्या देखिएपछि अमेरिकामै उपचार तथा आराम गरिरहेको जानकारी उनले प्रदेश सभा सचिवालयलाई गराएका थिए। तर लामो समयसम्म प्रदेश सभा बैठकमा अनुपस्थित रहँदा उनको सांसद पदसम्बन्धी प्रश्न उठेको थियो।

देउवा लामो समयदेखि अमेरिका रहे पनि पछिल्लो ११ महिनाको तलब तथा सेवा–सुविधा भने प्राप्त गर्दै आएका थिए। उनको खातामा पारिश्रमिक तथा विभिन्न सेवा–सुविधाबापत ७ लाख ५३ हजार ५०० रुपैयाँ भुक्तानी भएको जनाइएको छ।

कैलाली–५ ‘ख’ बाट निर्वाचित

देउवा २०७९ सालको प्रदेश सभा निर्वाचनमा कैलाली क्षेत्र नम्बर ५ को ‘ख’ बाट निर्वाचित भएका थिए। उनी सुदूरपश्चिम प्रदेश सरकारमा भौतिक पूर्वाधारमन्त्रीसमेत बनेका थिए।

उनी नेपाली कांग्रेसका निवर्तमान सभापति शेरबहादुर देउवाका भतिज हुन्।

प्रदेश सभा सचिवालयका अनुसार अब उनको पद रिक्त भएको औपचारिक जानकारी निर्वाचन आयोगलाई दिइनेछ। त्यसपछि रिक्त पदसम्बन्धी आवश्यक निर्वाचन प्रक्रिया अघि बढ्नेछ।

Originally published on abcnews.com.np.