काठमाडौं । नेपाल उद्योग वाणिज्य महासंघका अध्यक्ष अञ्जन श्रेष्ठ र संयुक्त राष्ट्रसंघकी नेपालस्थित आवासीय संयोजक लिला पिटर याहियाबीच मंगलबार महासंघको टेकुस्थित सचिवालयमा भेटवार्ता भएको छ ।

भेटमा नेपालको आर्थिक तथा सामाजिक विकासका लागि सरकार, निजी क्षेत्र, विकास साझेदार र संयुक्त राष्ट्रसंघलगायत सबै पक्षबीच परिणाममुखी सहकार्य आवश्यक रहेकोमा जोड दिइएको छ ।

महासंघका अध्यक्ष श्रेष्ठले सीप विकास, उद्यमशीलता, लगानी प्रवर्द्धन र मर्यादित रोजगारीलाई जोडेर संयुक्त राष्ट्रसंघसँग व्यावहारिक कार्यक्रम अघि बढाउन महासंघ इच्छुक रहेको बताए । उनले नेपालको अर्थतन्त्रमा लगानी र व्यवसायिक विश्वास पुनर्स्थापित गर्नु अहिलेको महत्वपूर्ण आवश्यकता रहेको उल्लेख गर्दै युवालाई स्वदेशमै रोजगारी तथा उद्यमका अवसर सिर्जना गर्दै विकासको केन्द्रमा राखिनुपर्ने बताए ।

आवासीय संयोजक याहियाले नेपालमा निजी क्षेत्रसँग बलियो साझेदारीका लागि संयुक्त राष्ट्रसंघ सकारात्मक रहेको बताइन् । उनले समावेशी तथा दिगो आर्थिक विकासका लागि नेपाललाई संयुक्त राष्ट्रसंघको निरन्तर सहयोग रहने बताइन् ।

स्तरोन्नतिपछि थप सहयोग आवश्यक

अध्यक्ष श्रेष्ठले नेपाल अतिकम विकसित मुलुकबाट स्तरोन्नतिको चरणमा रहेकाले स्तरोन्नतिको समय तीन वर्ष थप गरी सन् २०२९ नोभेम्बरसम्म पुर्‍याउन माग गरे । स्तरोन्नतिपछिको संक्रमण सहज बनाउन उत्पादन क्षमता, निर्यात प्रतिस्पर्धा, व्यापार सहजीकरण र अन्तर्राष्ट्रिय मापदण्ड पूरा गर्ने क्षमतामा संयुक्त राष्ट्रसंघको थप सहयोग आवश्यक रहेको उनको भनाइ थियो ।

याहियाले सरकारले यस विषयमा संयुक्त राष्ट्रसंघलाई अनुरोध गरिसकेको जानकारी दिँदै सम्बन्धित समितिले निर्णय गर्ने बताइन् । उनले स्तरोन्नतिलाई केवल हैसियत परिवर्तनका रूपमा नभई दिगो आर्थिक रूपान्तरण, रोजगारी सिर्जना, लगानी विस्तार तथा उत्पादन र निर्यात क्षमता बढाउने अवसरका रूपमा लिनुपर्नेमा जोड दिइन् ।

विप्रेषणमा निर्भर अर्थतन्त्र रूपान्तरण गर्नुपर्ने

याहियाले नेपालको युवा जनशक्ति र विभिन्न क्षेत्रमा रहेको सम्भावनालाई उपयोग गर्न स्थिर तथा पूर्वानुमानयोग्य नीति आवश्यक रहेको बताइन् । आयात प्रतिस्थापन र निर्यात प्रवर्द्धनमा केन्द्रित रणनीति आवश्यक रहेको उनको भनाइ थियो ।

उनले नेपालले अहिले उपलब्ध जनसांख्यिक लाभलाई उपयोग गर्नुपर्ने उल्लेख गर्दै विप्रेषणमा आधारित अर्थतन्त्रलाई उत्पादनमुखी अर्थतन्त्रमा रूपान्तरण गर्नुपर्ने बताइन् ।

महासंघका अध्यक्ष श्रेष्ठले साना तथा मझौला उद्यमलाई वित्तीय पहुँच, प्रविधि, सीप, बजार र सूचनाको सहज पहुँच उपलब्ध गराउन विशेष कार्यक्रम आवश्यक रहेको बताए । यस्ता उद्यमलाई प्रतिस्पर्धी, डिजिटल, औपचारिक तथा वातावरणमैत्री बनाउन महासंघ र संयुक्त राष्ट्रसंघबीच सहकार्य गर्न सकिने उनको भनाइ थियो।

Originally published on abcnews.com.np.