सुदूरपश्चिम प्रदेशका मुख्यमन्त्री खगराज भट्टले आज प्रदेशसभाबाट विश्वासको मत लिँदैछन् । संविधानको धारा १६८ को उपधारा (२) अनुसार मुख्यमन्त्रीमा नियुक्त भएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्थाअनुसार उनले विश्वासको मत लिन लागेका हुन् ।

प्रदेशसभा सचिवालयका सचिव देवबहादुर बोगटीका अनुसार मुख्यमन्त्री भट्टले मंगलबार विश्वासको मत लिने प्रयोजनका लागि बैठक व्यवस्थापन गरिदिन पत्र पठाएका थिए । सोहीअनुसार आज दिउँसो १ बजे प्रदेशसभा बैठक बोलाइएको छ ।

बैठकमा मुख्यमन्त्री भट्टले विश्वासको मतसम्बन्धी प्रस्ताव पेस गर्नेछन् । त्यसपछि प्रस्तावमाथि प्रदेशसभा सदस्यहरूले धारणा राख्नेछन् भने छलफलपछि मतदान प्रक्रिया अघि बढाइनेछ ।

गत साउन २९ गते भट्ट मुख्यमन्त्रीमा नियुक्त भएका थिए । नेकपा एमालेको समर्थनमा मुख्यमन्त्री बनेका भट्टले विश्वासको मत लिएपछि मन्त्रिपरिषद् विस्तार गर्ने तयारी गरेका छन् ।

सुदूरपश्चिम प्रदेशसभामा हाल मुख्यमन्त्री भट्ट नेतृत्वको नेपाली कम्युनिस्ट पार्टीका २२, नेपाली कांग्रेसका १८, नेकपा एमालेका ११ र राष्ट्रिय प्रजातन्त्र पार्टीका एकजना प्रदेशसभा सदस्य छन् ।

Originally published on abcnews.com.np.