वासिङ्टन डीसी । संयुक्त राज्य अमेरिकाले सिरियाको उत्तर–पश्चिमी इडलिब प्रान्तस्थित अबु अल–दुहुर सैन्य हवाई अड्डामा इजरायलले गरेको हवाई आक्रमणको निन्दा गरेको छ। अमेरिकाले उक्त आक्रमणले क्षेत्रीय तनाव थप बढाउन सक्ने भन्दै सबै पक्षलाई सैन्य कारबाहीभन्दा वार्ताको माध्यमबाट विवाद समाधान गर्न आग्रह गरेको छ।

सिरिया र इराकका लागि अमेरिकी राष्ट्रपति विशेष दूत टम ब्यारेकले सामाजिक सञ्जाल ‘एक्स’मार्फत इजरायली आक्रमणलाई ‘अनावश्यक तनावको स्रोत’ भनेका छन्।

उनका अनुसार सिरियाली सरकारले हाल आक्रामक गतिविधि नदेखाएको र कुनै प्रोक्सी सेनासँग सम्बन्धित नरहेको अमेरिकी बुझाइ छ। बरु सिरियाले इजरायलसँग तनाव कम गर्न चाहेको धारणा पटक–पटक व्यक्त गर्दै आएको ब्यारेकले बताएका छन्।

‘वार्तालाई प्राथमिकता दिनुपर्छ’

ब्यारेकले अमेरिकाले यसअघि सिरिया र इजरायलबीच वार्ताका लागि सहजीकरण गरिसकेको र आगामी दिनमा पनि संवादको वातावरण बनाउन तयार रहेको बताएका छन्।

उनले सबै पक्षलाई सैन्य कारबाहीको सट्टा वार्तालाई प्राथमिकता दिन आग्रह गर्दै रचनात्मक संवादमार्फत समस्या समाधान गर्न सकिने अमेरिकी विश्वास रहेको उल्लेख गरेका छन्।

अमेरिकी विशेष दूतको भनाइले सिरियामा पछिल्लो इजरायली सैन्य कारबाहीप्रति वासिङ्टनको असहमतिलाई सार्वजनिक रूपमा स्पष्ट पारेको छ।

कतारद्वारा पनि आक्रमणको निन्दा

सिरियाली हवाई अड्डामाथिको इजरायली आक्रमणको कतारले पनि कडा निन्दा गरेको छ।

कतारको विदेश मन्त्रालयले जारी गरेको विज्ञप्तिमा उक्त आक्रमणलाई सिरियाको सार्वभौमसत्ता, क्षेत्रीय अखण्डता तथा अन्तर्राष्ट्रिय कानुनको स्पष्ट उल्लंघन का रूपमा व्याख्या गरिएको छ।

कतारले सिरियाको सार्वभौम अधिकारको सम्मान गर्नुपर्नेमा जोड दिँदै क्षेत्रीय तनाव थप बढाउने सैन्य गतिविधि रोक्न आग्रह गरेको छ।

सिरियाले भन्यो– ‘अन्यायपूर्ण आक्रमण’

सिरियाली विदेश मन्त्रालयले पनि अबु अल–दुहुर एयरबेसमा भएको आक्रमणको निन्दा गरेको छ। बीबीसी फारसीका अनुसार सिरियाले इजरायली कारबाहीलाई ‘अन्यायपूर्ण’ भनेको छ।

इजरायलले भने उत्तर–पश्चिमी सिरियास्थित उक्त हवाई अड्डामा मंगलबार आक्रमण गर्नुको उद्देश्य टर्की सेनाको सम्भावित गतिविधि रोक्नु रहेको जनाएको छ।

इडलिब क्षेत्रमा सिरिया, इजरायल र टर्कीसहित विभिन्न पक्षको सुरक्षा चासो जोडिएको अवस्थामा पछिल्लो आक्रमणले क्षेत्रीय शक्ति सन्तुलन र सिरियाको सार्वभौमसत्तासम्बन्धी बहसलाई थप पेचिलो बनाएको छ।

अमेरिका, कतार र सिरियाले आक्रमणको विरोध जनाएसँगै अब इजरायलको उक्त सैन्य कारबाहीले सिरियासँगको तनाव थप बढाउँछ वा कूटनीतिक संवादतर्फ दबाब सिर्जना गर्छ भन्ने विषयमा अन्तर्राष्ट्रिय चासो बढेको छ।

Originally published on abcnews.com.np.