काठमाडौं । नेपाली कांग्रेसले १५औँ महाधिवेशनको निर्वाचन तालिका सार्वजनिक गरेको छ।

केन्द्रीय निर्वाचन समितिका संयोजक प्रेमबहादुर खड्काले विज्ञप्ति जारी गर्दै महाधिवेशनअन्तर्गतका विभिन्न तहका अधिवेशन तथा निर्वाचनको कार्यतालिका सार्वजनिक गरेका हुन्।

तालिकाअनुसार भदौ २ गतेदेखि १० गतेसम्म निर्वाचन प्रतिनिधि अभिमुखीकरण कार्यक्रम सञ्चालन हुनेछ। भदौ ११ गते जिल्लामा निर्वाचन अधिकृत खटाइनेछ भने भदौ १५ गते वडामा निर्वाचन प्रतिनिधि खटाइनेछ। भदौ १६ देखि २० गतेसम्म वडास्तरीय अभिमुखीकरण कार्यक्रम सञ्चालन गर्ने तालिका छ।

भदौ मसान्तसम्म जनसम्पर्क समितिका अधिवेशन सम्पन्न गर्ने कांग्रेसको तयारी छ। निर्वाचन समितिका अनुसार अमेरिका, जापान, फ्रान्स, दक्षिण कोरियालगायत १५ देशका जनसम्पर्क समितिका अधिवेशन यसअघि नै सम्पन्न भइसकेका छन्।

कांग्रेसले भदौ २४ गते सबै वडामा अधिवेशन गर्ने भएको छ। त्यसपछि भदौ २७ गते गाउँ/नगर अधिवेशन, भदौ ३१ गते प्रदेशसभा क्षेत्रीय अधिवेशन र एकमात्र प्रतिनिधिसभा निर्वाचन क्षेत्र भएका जिल्लामा असोज २ गते जिल्ला अधिवेशन गर्ने तालिका छ।

त्यस्तै, असोज ७ गते जिल्ला अधिवेशन, असोज १० गते प्रदेश अधिवेशन सम्पन्न गर्ने कार्यतालिका सार्वजनिक गरिएको छ।

केन्द्रीय निर्वाचन समितिका अनुसार कांग्रेसको १५औँ महाधिवेशन असोज १६ देखि १९ गतेसम्म सम्पन्न हुनेछ।

Originally published on abcnews.com.np.