प्रतिवेदनअनुसार सबैभन्दा धेरै मूल्य वृद्धि स्थानीय सानो गोलभेँडामा देखिएको छ । यसको मूल्य २५३ प्रतिशतले बढेको छ । टनेलमा उत्पादन गरिएको सानो गोलभेँडाको मूल्य पनि १५८.६ प्रतिशतले बढेको प्रतिवेदनमा उल्लेख छ ।

त्यस्तै, हरियो खुर्सानीको मूल्य १७९.४ प्रतिशतले बढेको छ । आँप (दशहरी)को मूल्य १६० प्रतिशत, पिँडालुको १५७ प्रतिशत तथा रायोको साग र तने बोडीको मूल्य १५० प्रतिशतसम्म वृद्धि भएको छ ।

केही वस्तुको मूल्य स्थिर

तरकारी तथा फलफूलको मूल्यमा ठूलो उतारचढाव देखिए पनि केही वस्तुको मूल्य भने स्थिर रहेको छ । प्रतिवेदनअनुसार सिताके च्याउ र हरियो छ्याप्पीको मूल्यमा परिवर्तन भएको छैन ।

अभोकाडोको मूल्य ०.६७ प्रतिशत, ताजा रहु माछाको १.५१ प्रतिशत र पाकेको फर्सीको मूल्य १.७८ प्रतिशतले मात्रै परिवर्तन भएको छ ।

चामल र चिउराको मूल्य पनि बढ्यो

खाद्यान्नतर्फ वैशाखको तुलनामा असारमा सोना मन्सुली, स्टिम जिरा र मोटा चामलको मूल्यमा सामान्य वृद्धि भएको छ । थोक बजारमा चामल र चिउराको मूल्य बढ्दा पिठो र मैदाको मूल्य भने केही घटेको प्रतिवेदनले देखाएको छ ।

असारमा चिनीको खुद्रा मूल्य प्रतिकिलो १०५ देखि ११० रुपैयाँसम्म पुगेको छ ।

तरकारी, फलफूल तथा खाद्य वस्तुको मूल्यमा भएको यस्तो वृद्धिले उपभोक्ताको दैनिक खर्चमा प्रत्यक्ष दबाब बढाएको प्रतिवेदनले जनाएको छ।