काठमाडौं । पूर्वप्रधानन्यायाधीश चोलेन्द्रशम्शेर राणाविरुद्धको महाभियोग प्रकरणको रिटमाथि अब आगामी भदौ १० गते सुनुवाइ हुने भएको छ। सर्वोच्च अदालतले बुधबार, भदौ ३ गते बहस नसकिएपछि सो मुद्दा ‘हेर्दाहेर्दै’ को अवस्थामा राखेको थियो।

सर्वोच्च अदालतका प्रवक्ता अर्जुन कोइरालाले महाभियोग प्रकरणको रिट आगामी १० गते सुनुवाइका लागि तय गरिएको जानकारी दिए। उन अनुसार, रिट निवेदकतर्फका कानुनविद्हरूले पूर्वप्रधानन्यायाधीश राणामाथिको महाअभियोग अझै जीवित रहेको दाबी गरेका छन् र प्रतिनिधिसभाबाट कारबाहीका लागि परमादेश जारी हुनुपर्ने माग राखेका छन्।

संघीय संसद्का तत्कालीन महासचिव भरतराज गौतमले राणालाई निलम्बन फुकुवाको पत्र दिएपछि सर्वोच्च अदालत बारका तत्कालीन अध्यक्ष वरिष्ठ अधिवक्ता पूर्णमान शाक्यलगायतले सर्वोच्चमा रिट दायर गरेका थिए। अब, महाभियोग प्रकरणमा छुट्टाछुट्टै निवेदन पेस गरेका वरिष्ठ अधिवक्ता डा. पुण्यप्रसाद खतिवडा र दिपकविक्रम मिश्र पक्षका कानुनव्यवसायीको बहस सकिएपछि सरकारका तर्फबाट प्रतिरक्षा प्रस्तुत गरिने छ।

Originally published on abcnews.com.np.