काठमाडौं -नेकपा (एमाले) संसदीय दलकी उपनेता एवं सचिव पद्मा अर्यालले वर्तमान सरकार जनअपेक्षाअनुसार काम गर्न असफल भएको आरोप लगाएकी छन्।

बुधबार संघीय संसद भवनबाहिर सञ्चारकर्मीहरूसँग कुरा गर्दै अर्यालले सरकारले जनतामा आशा जगाउन नसकेको र उनीहरूका आधारभूत समस्या समाधानमा समेत उदासीनता देखाएको बताइन्।

सरकार गठनका सुरुवाती दिनमा गरिएका ठूला प्रतिबद्धता र आश्वासनअनुसार काम हुन नसकेको उनको भनाइ छ। दैनिक जीवनसँग जोडिएका समस्या समाधान नहुँदा जनतामा निराशा र असन्तुष्टि बढ्दै गएको उनले बताइन्।

सरकार गठन भएको लामो समय बितिसक्दा पनि जनजीविकासँग सम्बन्धित विषयमा ठोस सुधार हुन नसकेको दाबी गर्दै अर्यालले सरकारको सुस्त कार्यशैलीले जनताको अपेक्षा पूरा गर्न नसक्ने टिप्पणी गरिन्।

किसानले धान बालीको समयमा समेत मल नपाएको विषय संसदमा पटक–पटक उठाउँदा सरकारले बेवास्ता गरेको उनले आरोप लगाइन्। बजारमा देखिएको खाना पकाउने ग्यासको समस्या समाधानमा पनि सरकार गम्भीर नभएको उनको भनाइ छ।

एउटा ग्यास सिलिन्डर लिन राष्ट्रिय परिचयपत्र र नागरिकता पेस गर्नुपर्ने व्यवस्था गरेर सरकारले सर्वसाधारणलाई अनावश्यक सास्ती दिएको अर्यालले बताइन्।

‘आजका समस्या समाधान गर्ने जिम्मेवारी वर्तमान सरकारकै हो। जनताले आजको सरकार खोजेका हुन्, विगतको होइन। जिम्मेवारीबाट भागेर पूर्ववर्ती सरकारतर्फ औँला ठड्याउनु गैरजिम्मेवारीको पराकाष्ठा हो,’ उनले भनिन्।

आफ्नो कमजोरी ढाकछोप गर्न वर्तमान सरकारले विगतका सरकारलाई दोष दिने गरेको भन्दै अर्यालले आपत्ति जनाइन्। गृहमन्त्रीका पछिल्ला अभिव्यक्तिप्रति टिप्पणी गर्दै उनले त्यसलाई ‘केटाकेटीपन’को संज्ञा दिइन्।

गृहमन्त्रीले आफ्ना कतिपय अभिव्यक्तिलाई ‘जोक’ भन्दै पन्छाउन खोज्नु र छानबिन प्रतिवेदन सार्वजनिक गर्न चुनौती दिनु जिम्मेवार पदमा बसेका व्यक्तिका लागि अशोभनीय भएको उनको टिप्पणी छ।

सुशासन र पारदर्शिताको नारा दिनेहरूले सबै छानबिन प्रतिवेदन सार्वजनिक गरेर आफूलाई उदाहरणका रूपमा प्रस्तुत गर्नुपर्नेमा अर्यालले जोड दिइन्।

Originally published on abcnews.com.np.