हेटौँडा । बागमती प्रदेशका मुख्यमन्त्री किरण थापामगरले भदौ ७ गते आइतबार प्रदेशसभाबाट विश्वासको मत लिने भएका छन्।
प्रदेशसभा सचिवालयले जारी गरेको सूचनाअनुसार प्रदेशसभाको आठौँ अधिवेशनअन्तर्गत १८औँ बैठक भदौ ७ गते दिउँसो १ बजे बस्नेछ। सोही बैठकमा मुख्यमन्त्री थापामगरले नेपालको संविधानको धारा १६८ को उपधारा (४) तथा प्रदेशसभा नियमावली, २०७४ को नियम १४३ बमोजिम विश्वासको मतसम्बन्धी प्रस्ताव पेस गर्ने तयारी गरेका छन्।
प्रदेशसभा नियमावली, २०७४ को नियम ६ अनुसार उपसभामुखले बैठकको मिति र समय निर्धारण गरेकी हुन्।
संविधानको धारा १६८ को उपधारा (२) बमोजिम गठन भएको सरकारले प्रदेशसभाबाट विश्वासको मत लिनुपर्ने व्यवस्था छ। सोही संवैधानिक व्यवस्थाअनुसार मुख्यमन्त्री नियुक्त भएपछि थापामगरले विश्वासको मत लिन लागेका हुन्।
६३ सांसदको समर्थनमा मुख्यमन्त्री
मुख्यमन्त्री थापामगर एमाले, नेकपा र राष्ट्रिय प्रजातन्त्र पार्टी (राप्रपा)का गरी ६३ जना प्रदेशसभा सदस्यको समर्थनमा मुख्यमन्त्री नियुक्त भएका हुन्।
उनले भदौ ३ गते ती तीन दलको समर्थनसहित प्रदेश प्रमुखसमक्ष सरकार गठनका लागि दाबी पेस गरेका थिए। त्यसपछि प्रदेश प्रमुख दीपकप्रसाद देवकोटाले भदौ ४ गते थापामगरलाई मुख्यमन्त्री नियुक्त गर्दै पद तथा गोपनीयताको शपथ गराएका थिए।
५३ मत आवश्यक
१०४ सदस्यीय बागमती प्रदेशसभामा सरकारलाई विश्वासको मत प्राप्त गर्न कम्तीमा ५३ जना सांसदको समर्थन आवश्यक पर्छ। वर्तमान सत्ता गठबन्धनसँग ६३ सांसदको समर्थन रहेको दाबी गरिएको छ।
प्रदेशसभामा नेपाली कांग्रेसका ३६, नेकपाका २६, एमालेका २५, राप्रपाका १२, नेपाल मजदुर किसान पार्टीका ३ र हाम्रो नेपाली पार्टीका २ जना सांसद छन्।
गठबन्धनसँग दाबी गरिएको समर्थन कायम रहेमा मुख्यमन्त्री थापामगरले आवश्यक मतभन्दा १० मत बढीले विश्वासको मत प्राप्त गर्ने अवस्था देखिएको छ।
Originally published on abcnews.com.np.
प्रतिक्रिया दिनुहोस्