काठमाडौँ । गृहमन्त्री सुधन गुरुङले जघन्य अपराध नियन्त्रणका लागि बलियो कानुनी तथा संस्थागत व्यवस्था गर्न सरकार प्रतिबद्ध रहेको बताउनुभएको छ ।

तीन वर्षीया गरिमा चौधरीमाथि भएको जघन्य अपराधले आफूलाई अत्यन्त दुःखी बनाएको उल्लेख गर्दै गृहमन्त्री गुरुङले घटनामा कानुनले दिन सक्ने अधिकतम न्याय सुनिश्चित गर्न सरकार प्रतिबद्ध रहेको बताउनुभएको हो ।

सामाजिक सञ्जालमार्फत उहाँले घटनाका आरोपितलाई तत्काल पक्राउ गरी अनुसन्धान अघि बढाइएको जानकारी दिनुभएको छ ।

“हाम्रो लक्ष्य एउटा घटनामा दोषीलाई सजाय दिलाउनुमा मात्र सीमित छैन । हाम्रा छोरी डराएर होइन, सुरक्षित भएर बाँच्न सक्ने समाज निर्माण गर्नु हो,” उहाँले लेख्नुभएको छ ।

गृहमन्त्री गुरुङले विगतका अनुभव र कमजोरीबाट पाठ सिक्दै घटनाको अनुसन्धान प्रक्रिया अघि बढाइएको बताउनुभएको छ । उहाँले कानुनको पूर्ण पालना गर्दै दोषीलाई कडा कारबाही गरिने प्रतिबद्धता व्यक्त गर्नुभएको छ ।

प्रहरीको लापरबाहीबारे पनि छानबिन

घटनाको प्रारम्भिक चरणमा प्रहरीबाट लापरबाही भएको भन्ने प्रश्न उठेपछि सम्बन्धित प्रहरी अधिकारीमाथि समेत छानबिन तथा कारबाहीको प्रक्रिया अघि बढाइएको गृहमन्त्री गुरुङले स्पष्ट पार्नुभएको छ ।

उहाँका अनुसार प्रहरीबाट भएको भनिएको लापरबाहीको सत्यतथ्य पत्ता लगाउन उच्चस्तरीय छानबिन समिति गठन गरिएको छ । अनुसन्धान निष्पक्ष रूपमा अघि बढाउन सम्बन्धित निकायलाई निर्देशन दिइसकेको उहाँले बताउनुभएको छ ।

गृहमन्त्री गुरुङले जघन्य अपराध नियन्त्रणका लागि तत्कालीन घटनामा कारबाहीसँगै दीर्घकालीन रूपमा कानुनी र संस्थागत सुधार आवश्यक रहेको उल्लेख गर्नुभएको छ ।

Originally published on abcnews.com.np.