जनकपुरधाम । तस्करीको सामानसहित पक्राउ परेका व्यक्तिलाई प्रहरी कार्यालयबाटै छाडिएको विवादमा मुछिएका सप्तरीको इलाका प्रहरी कार्यालय बोदेबरसाइनका कार्यालय प्रमुख प्रहरी नायब निरीक्षक (सई) शिवशंकर शर्मा जिल्ला प्रहरी कार्यालय सप्तरी तानिएका छन् ।

भारतबाट भन्सार छली ल्याइएको मोबाइल पार्ट्स र मोटरसाइकलसहित पक्राउ परेका व्यक्तिलाई प्रहरी कार्यालयबाटै छाडिएको आरोप लागेपछि शर्मालाई जिल्ला तानिएको हो ।

साउन १८ गते बोदेबरसाइन नगरपालिका–५ स्थित बोदेबरसाइन गाउँबाट भारतबाट भन्सार छली ल्याइएको मोबाइल पार्ट्स र मोटरसाइकलसहित भरिया सुनिल मण्डललाई स्थानीयको सहयोगमा प्रहरीले नियन्त्रणमा लिएको थियो । उनलाई मोटरसाइकल र सामानसहित इलाका प्रहरी कार्यालय बोदेबरसाइन लगिएको थियो ।

मण्डललाई छुटाउन मुख्य कारोबारी भनिएका देवकुमार यादवसमेत प्रहरी कार्यालय पुगेपछि प्रहरीले उनलाई पनि नियन्त्रणमा लिएको थियो । तर, अनुसन्धान र कारबाही अघि बढाउनुको साटो पक्राउ परेका दुवैलाई प्रहरी कार्यालयबाटै छाडिएको आरोप लागेपछि प्रहरीको भूमिकामाथि प्रश्न उठेको थियो ।

घटनापछि जिल्ला प्रहरी कार्यालय सप्तरीले सार्वजनिक गरेको विवरण स्थानीयले बताएको घटनाक्रमभन्दा फरक रहेको पाइएको थियो । प्रहरीले घटनाको समय, स्थान र बरामद भएको सामानसम्बन्धी विवरणसमेत फरक रूपमा सार्वजनिक गरेको आरोप लागेको थियो ।

जिल्ला प्रहरी कार्यालयले साउन २१ गते जारी गरेको विज्ञप्तिमा साउन १९ गते राति करिब १२ः३० बजे बोदेबरसाइन नगरपालिका–५ स्थित शिवचोकबाट नम्बर प्लेट नभएको रातो रङको हिरो एक्स्ट्रिम १६० सीसी मोटरसाइकल तथा विभिन्न मोबाइलका सामान बरामद गरिएको उल्लेख गरेको थियो ।

प्रहरीका अनुसार प्रहरी टोलीलाई देखेपछि तस्करले मोटरसाइकल र बोरा सोही स्थानमा छाडेर फरार भएका थिए । पछि बोराहरू खोलेर जाँच गर्दा विभिन्न मोबाइलका सामान फेला परेको प्रहरीले जनाएको थियो ।

तर, स्थानीयका अनुसार सामानसहित व्यक्ति र मोटरसाइकल साउन १८ गते अपराह्न करिब ३ः३० बजे नै नियन्त्रणमा लिइएको थियो । घटनाको वास्तविक विवरणभन्दा फरक विवरण सार्वजनिक गरिएको भन्दै इलाका प्रहरी कार्यालय बोदेबरसाइनमाथि प्रश्न उठेको थियो । यस विषयमा जिल्ला प्रहरी कार्यालयका प्रमुख एसपी रुपक खड्काको भूमिकामाथि समेत प्रश्न उठाइएको थियो ।

पाँच सदस्यीय छानबिन समिति

घटनाबारे समाचार सार्वजनिक भएपछि जिल्ला प्रहरी कार्यालय सप्तरीले डीएसपी हेमराज घिमिरेको नेतृत्वमा पाँच सदस्यीय छानबिन समिति गठन गरेको थियो ।

प्रहरी स्रोतका अनुसार प्रारम्भिक छानबिनका क्रममा सई शर्माले माथिल्लो निकायमा घटनासम्बन्धी गलत जाहेरी पेस गरेको देखिएको छ ।

तस्करीमा संलग्न भनिएका व्यक्तिलाई प्रहरी कार्यालयबाटै छाडिएको विषयमा विवाद बढ्दै गएपछि शुक्रबार शर्मालाई इलाका प्रहरी कार्यालय बोदेबरसाइनबाट जिल्ला प्रहरी कार्यालय सप्तरीमा झिकाइएको हो ।

Originally published on abcnews.com.np.