काठमाडौं । भोटेकोसी नदीमा आएको बाढीपछि आज बसेको सर्वदलीय बैठकले १० बुँदे संयुक्त अपिल जारी गरेको छ। राष्ट्रिय स्वतन्त्र पार्टी (रास्वपा)का सभापति रवि लामिछानेको आह्वानमा बसेको बैठकले विपद् प्रभावित क्षेत्रमा राहत, उद्धार तथा पुनःस्थापनाका लागि राजनीतिक दलहरूबीच सहकार्य गर्ने प्रतिबद्धता जनाएको हो।

संयुक्त अपिलमा विपद्को समयमा गरिने सहयोगलाई राजनीतिक लाभ वा स्वार्थपूर्तिको माध्यम नबनाउन आग्रह गरिएको छ। राहत तथा आर्थिक सहायता संकलन गर्दा सरकारले तोकेको एकद्वार प्रणालीको पूर्ण पालना गर्न पनि अपिल गरिएको छ।

त्यस्तै, सामाजिक सञ्जालमार्फत सूचना सम्प्रेषण गर्दा संवेदनशील विषयमा विशेष सावधानी अपनाउन तथा अपुष्ट सूचना फैलिन नदिन आग्रह गरिएको छ।

शीर्ष नेताको हस्ताक्षर

संयुक्त अपिलमा रास्वपा सभापति रवि लामिछाने, नेपाली कांग्रेसका सभापति गगन थापा, नेकपाका संयोजक पुष्पकमल दाहाल ‘प्रचण्ड’, एमालेका महासचिव शंकर पोखरेल, श्रम संस्कृति पार्टीका सांसद ध्रुवराज राई, राप्रपा अध्यक्ष राजेन्द्र लिङ्देन, जसपा अध्यक्ष उपेन्द्र यादव र जनमत पार्टीका तर्फबाट चन्दन सिंहले हस्ताक्षर गरेका छन्।

राहत र पुनःनिर्माणमा सहकार्य

बैठकमा सहभागी दलहरूले प्राकृतिक विपद्का कारण प्रभावित नागरिकको जीवनरक्षा, तत्काल उद्धार, राहत वितरण तथा दीर्घकालीन पुनःनिर्माणमा एकजुट भएर काम गर्ने प्रतिबद्धता जनाएका छन्।

रास्वपा सभापति लामिछानेले विपद्को गम्भीर अवस्थालाई ध्यानमा राख्दै राजनीतिक मतभेदभन्दा माथि उठेर सबै दल र पक्ष एकजुट हुनुपर्ने आवश्यकता औँल्याएका थिए। सोहीअनुसार सर्वदलीय बैठक बोलाइएको हो।

Originally published on abcnews.com.np.