सिन्धुपाल्चोक । भोटेकोसी नदीमा आएको बाढीबाट सिर्जित प्राकृतिक विपद्को सामना गर्न संसद्मा रहेका तथा बाहिर रहेका राजनीतिक दलहरू साझा संकल्पसहित एकजुट भएका छन्।

राष्ट्रिय स्वतन्त्र पार्टी (रास्वपा)ले बिहीबार आयोजना गरेको सर्वदलीय बैठकमा सहभागी दलहरूले खोज तथा उद्धार, राहत र विपद् व्यवस्थापनमा सरकारलाई पूर्ण सहयोग गर्ने तथा दीर्घकालीन पुनर्निर्माणका लागि संसदीय संयन्त्र गठन गर्ने निर्णय गरेका छन्।

बैठकपछि सञ्चारकर्मीसँग कुरा गर्दै नेपाली कांग्रेसका सभापति गगन थापाले राष्ट्रिय विपत्तिका बेला सबै दल एक ठाउँमा उभिने परम्परालाई निरन्तरता दिँदै संकट समाधानमा केन्द्रित हुने बताए।

उनका अनुसार बैठकमा सरकारले गरिरहेको खोज, उद्धार तथा राहत वितरणको प्रारम्भिक अवस्थाबारे जानकारी गराइएको थियो। राजनीतिक दलहरूले विभिन्न माध्यमबाट प्राप्त गरेका सूचनासमेत सरकारलाई उपलब्ध गराएका छन्।

खोज, उद्धार र राहत पहिलो प्राथमिकता

सभापति थापाले अहिलेको मुख्य प्राथमिकता खोजी, उद्धार र तत्काल राहत रहेको बताए।

उनले बाढीबाट भएको क्षति ठूलो भएकाले पुनर्निर्माणको काम लामो समयसम्म चल्ने र ठूलो आर्थिक स्रोत आवश्यक पर्ने उल्लेख गर्दै सरकारको कामको निरन्तर अनुगमन तथा आवश्यक सुझाव दिन संयुक्त संसदीय संयन्त्र आवश्यक रहेको बताए।

“अहिलेको मुख्य प्राथमिकता खोज, उद्धार र तत्काल राहत नै हो। पुनर्निर्माणको काम वर्षौँसम्म चल्ने र यसमा खर्बौँ रुपैयाँको क्षति हुने देखिएकाले लगातार अनुगमन गर्न, सरकारलाई सुझाव दिन र दलहरूलाई संयुक्त रूपमा परिचालन गर्न संसदीय संयन्त्र आवश्यक छ।”

संसद्बाहिरका दल पनि संयन्त्रमा समेटिने

थापाका अनुसार प्रस्तावित संसदीय संयन्त्रमा संसद्मा प्रतिनिधित्व नभएका राजनीतिक दललाई समेत समेटिनेछ।

विपद्पछि केही समय बितेपछि प्राथमिकता परिवर्तन हुने र पीडितहरू दीर्घकालसम्म समस्यामा पर्ने विगतको प्रवृत्ति दोहोरिन नदिन यसपटक दलहरूबीच निरन्तर समन्वय र अनुगमन गर्ने सहमति भएको उनले बताए।

Originally published on abcnews.com.np.