काठमाडौं । भोटेकोसी नदीमा आएको बाढीबाट प्रभावित क्षेत्रमा खोज, उद्धार तथा राहत व्यवस्थापनका लागि ७ हजार ४१५ जना सुरक्षाकर्मी परिचालन गरिएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका उपसचिव रामबहादुर केसीका अनुसार, नेपाल प्रहरीका ३ हजार ३१८, नेपाली सेनाका २ हजार ३५५ र सशस्त्र प्रहरी बल नेपालका १ हजार ७४२ सुरक्षाकर्मी प्रभावित क्षेत्रमा खटिएका छन्।

प्राधिकरणका अनुसार बाढी प्रभावित क्षेत्रमा हालसम्म २३९ वटा हेलिकोप्टर उडानमार्फत खोज तथा उद्धार कार्य गरिएको छ। तीमध्ये नेपाली सेनाका हेलिकोप्टरबाट २११ र निजी क्षेत्रका हेलिकोप्टरबाट २८ जना उद्धार गरिएको जनाइएको छ। प्रभावित क्षेत्रमा राहत व्यवस्थापनको काम पनि जारी छ।

पाँच जिल्लामा बाढीको प्रभाव

तिब्बततर्फबाट भोटेकोसी नदी हुँदै आएको बाढी रसुवागढी, टिमुरे र स्याफ्रुबेँसी हुँदै त्रिशूली नदीमा मिसिएपछि रसुवा, नुवाकोट, धादिङ, गोरखा र चितवनका त्रिशूली नदी तटीय क्षेत्रमा गम्भीर जोखिम सिर्जना भएको प्राधिकरणले जनाएको छ।

बाढीका कारण नदी तटीय क्षेत्रमा मानवीय तथा भौतिक क्षति भएको छ भने प्रभावित नागरिकको खोजी तथा उद्धार कार्यलाई तीव्रता दिइएको छ।

घाइतेको उपचार र राहत व्यवस्थापन

घाइतेहरूको उपचारका लागि नुवाकोट जिल्ला अस्पतालमा नेपाली सेना, नेपाल प्रहरी, सशस्त्र प्रहरी बल, राष्ट्रिय ट्रमा सेन्टर, वीर अस्पताल तथा त्रिभुवन विश्वविद्यालय शिक्षण अस्पतालका चिकित्सकसहितको स्वास्थ्य टोली परिचालन गरिएको छ।

त्यस्तै, प्रभावित नागरिकका लागि नेपाली सेनाका ब्यारेकमा अस्थायी बसोबास, खानेकुरा, खानेपानी तथा औषधिको व्यवस्था गरिएको प्राधिकरणले जनाएको छ।

खोज तथा उद्धारसँगै प्रभावित क्षेत्रमा आवश्यक राहत सामग्री पुर्‍याउने र विस्थापित नागरिकलाई सुरक्षित स्थानमा व्यवस्थापन गर्ने कार्यलाई प्राथमिकतामा राखिएको छ।

Originally published on abcnews.com.np.