काठमाडौं । भोटेकोसी नदीमा आएको विनाशकारी बाढीका कारण अपर त्रिशूली–३ ‘ए’ जलविद्युत् आयोजनामा रोकिएका कर्मचारीको उद्धारका लागि नेपाली सेनाको हेलिकप्टर बिहीबार बिहान आयोजना स्थलमा सफलतापूर्वक अवतरण गरेको छ।

प्रतिकूल मौसमका कारण बुधबार दुईपटक हेलिकप्टर अवतरणको प्रयास असफल भएको थियो। बिहीबार बिहान भने हेलिकप्टर अवतरण गर्न सफल भएपछि त्यहाँ पुगेको टोलीले आयोजनाको अवस्था र बाढीबाट भएको क्षतिको स्थलगत मूल्यांकन थालेको छ। ऊर्जा, जलस्रोत तथा सिँचाइमन्त्री विराजभक्त श्रेष्ठको निर्देशनमा उद्धार, स्थलगत निरीक्षण तथा विद्युत् पुनर्स्थापनालाई तीव्रता दिन नेपाल विद्युत् प्राधिकरणका कार्यकारी निर्देशक दीर्घायुकुमार श्रेष्ठको नेतृत्वमा उच्चस्तरीय टोली प्रभावित क्षेत्रमा परिचालन गरिएको छ।टोलीमा प्राधिकरणका उपकार्यकारी निर्देशक किरणकुमार श्रेष्ठ, वितरण तथा ग्राहक सेवा निर्देशनालयका प्रमुख एवं प्रवक्ता राजन ढकाल तथा एनईए इन्जिनियरिङ कम्पनीका प्रमुख कार्यकारी अधिकृत चिरन्तन विक्रम राणालगायत सहभागी छन्।

वैकल्पिक लाइनबाट विद्युत् आपूर्ति

यसैबीच, बाढीबाट प्रभावित नुवाकोटका विभिन्न क्षेत्रमा वैकल्पिक माध्यमबाट विद्युत् आपूर्ति पुनःस्थापना गरिएको छ। खरानीटार, समुन्द्रटार, चौगाडा, लिखु र पञ्चकन्या क्षेत्रमा वैकल्पिक लाइनमार्फत विद्युत् सेवा सञ्चालन भइसकेको प्राधिकरणले जनाएको छ।नुवाकोटका अन्य प्रभावित क्षेत्रमा विद्युत् सेवा पुनःस्थापनाका लागि चपली–देवीघाट ६६ केभी तथा बालाजु–त्रिशूली ६६ केभी लाइनलाई ११ केभीमा चार्ज गर्ने तयारी भइरहेको छ। यसका लागि प्राविधिक टोली प्रभावित क्षेत्रमा खटिएको छ।

क्षति मूल्यांकनपछि पुनर्निर्माण

आयोजनास्थल पुगेको टोलीले बाढीबाट क्षतिग्रस्त संरचनाको विस्तृत निरीक्षण तथा मूल्यांकन गर्नेछ। त्यसका आधारमा पुनर्निर्माण तथा विद्युत् प्रणालीमा पुनःजडानको योजना अघि बढाइनेछ। नेपाल विद्युत् प्राधिकरणले प्रभावित क्षेत्रमा विद्युत् सेवा यथाशीघ्र सञ्चालनमा ल्याउन आवश्यक प्राविधिक उपाय अपनाइरहेको जनाएको छ। साथै, बाढीबाट क्षतिग्रस्त संरचनाको मर्मत तथा पुनर्निर्माणका लागि आवश्यक बजेट व्यवस्थापन गरिएको प्राधिकरणले जनाएको छ।

Originally published on abcnews.com.np.