काठमाडौं । बाढी तथा प्राकृतिक विपद्बाट प्रभावित नागरिकको उद्धार, राहत र पुनर्स्थापनाका लागि सूर्य नेपाल प्रालिले प्रधानमन्त्री दैवी प्रकोप उद्धार कोषमा १५ करोड रुपैयाँ सहयोग गरेको छ।

सूर्य नेपालले शुक्रबार अर्थमन्त्री डा. स्वर्णिम वाग्लेलाई भेटेर उक्त रकम बराबरको चेक हस्तान्तरण गरेको हो।

कम्पनीका अनुसार पूर्वजानकारीसहित प्रधानमन्त्री दैवी प्रकोप उद्धार कोषमा उपलब्ध गराइएको यो रकम हालसम्म निजी क्षेत्रबाट प्राप्त सबैभन्दा ठूलो सहयोग हो।

अर्थमन्त्री वाग्लेलाई सूर्य नेपालका प्रबन्ध निर्देशक गौरव तयाल, उपाध्यक्षद्वय डिप्रा लहेरी र रवि केसी तथा महाप्रबन्धक प्रेम अर्यालले संयुक्त रूपमा चेक हस्तान्तरण गरेका थिए।

पछिल्लो समय भोटेकोशी तथा त्रिशूली नदी क्षेत्रमा आएको विनाशकारी बाढीका कारण रसुवा, नुवाकोट, धादिङलगायतका जिल्लामा ठूलो जनधनको क्षति भएको छ। विपद्पछि प्रभावितको उद्धार तथा राहतका लागि सरकार र निजी क्षेत्रबाट सहयोग जुटाउने क्रम जारी छ।

सूर्य नेपालको यो सहयोग बाढी तथा विपद्बाट प्रभावित नागरिकका लागि राहत, उद्धार तथा पुनर्स्थापनाका काममा परिचालन गरिनेछ।

Originally published on abcnews.com.np.