काठमाडौं । बाढीबाट प्रभावित त्रिशूली, गजुरी र गल्छी क्षेत्रका ग्राहकलाई वर्ल्डलिंक कम्युनिकेसन्सले विशेष राहत सुविधा उपलब्ध गराउने भएको छ।

बाढीका कारण प्रभावित ग्राहकलाई थप आर्थिक भार नपरोस् भन्ने उद्देश्यले ती क्षेत्रमा तत्काल इन्टरनेट सेवा विच्छेद नगर्ने कम्पनीले जनाएको छ। नियमित रूपमा सेवा शुल्क तिर्न नसकेका वा सेवा अवधि सकिन लागेका ग्राहकको इन्टरनेट पनि तत्काल बन्द नगरिने वर्ल्डलिंकले स्पष्ट पारेको छ।

कम्पनीका अनुसार नवीकरणको म्याद सकिन लागेका ग्राहकलाई थप पाँच दिनको निःशुल्क इन्टरनेट सेवा उपलब्ध गराइनेछ। बाढीका कारण विस्थापित तथा आर्थिक रूपमा प्रभावित ग्राहकलाई यसबाट केही राहत पुग्ने अपेक्षा गरिएको छ।

भोटेकोशी तथा त्रिशूली क्षेत्रमा आएको विनाशकारी बाढीका कारण त्रिशूली, गजुरी र गल्छीलगायतका क्षेत्रमा सडक, पुल तथा अन्य भौतिक संरचनामा क्षति पुगेको छ। बाढीका कारण स्थानीय बासिन्दाको दैनिक जीवनसमेत प्रभावित भएको छ।

यस्तो कठिन परिस्थितिमा सञ्चार सेवा निरन्तर राख्नु आवश्यक रहेको भन्दै वर्ल्डलिंकले प्रभावित ग्राहकलाई सहयोग गर्ने नीति लिएको हो।

कम्पनीले बाढी प्रभावित क्षेत्रका ग्राहक तथा सर्वसाधारणलाई ‘तपाईंको सुरक्षा नै पहिलो प्राथमिकता हो’ भन्दै जोखिमयुक्त स्थानबाट टाढा रहन र सुरक्षित स्थानमा बस्न आग्रह गरेको छ।

Originally published on abcnews.com.np.