बागलुङ, १४ भदौ । प्रहरीले अवैध रूपमा काठ ओसारपसार गरिरहेको अवस्थामा बागलुङको काठेखोला गाउँपालिका–३ बिहुँबाट तीन जनालाई पक्राउ गरेको छ।

ना ५ ख २३७६ नम्बरको ट्रकमा काठ लुकाएर लैजाँदै गरेको अवस्थामा उनीहरूलाई पक्राउ गरिएको जिल्ला प्रहरी कार्यालय बागलुङका सूचना अधिकारी प्रहरी नायब उपरीक्षक रामेश्वर त्वातीले जानकारी दिए।

पक्राउ पर्नेमा चितवनको राप्ती नगरपालिका–११ का २६ वर्षीय बुद्धीलाल प्रजा, काठेखोला गाउँपालिका–६ बिहुँका २७ वर्षीय खिमानन्द कँडेल र ट्रक चालक निसीखोला गाउँपालिका–६ का ३३ वर्षीय श्याम बुढामगर रहेका छन्।

बिहुँबाट अवैध रूपमा काठ ओसारपसार भइरहेको सूचनाका आधारमा प्रहरीले ट्रक नियन्त्रणमा लिएर उनीहरूलाई पक्राउ गरेको हो।

प्रहरीका अनुसार ट्रकमा चिलाउने, उत्तिसलगायतका काठ लोड गरिएको छ। ती काठमा कुनै पनि प्रकारको टाँचा नलगाइएको पाइएको छ।

“बिहुँबाट पहिलेदेखि नै काठ बाहिर पठाउने काम हुँदै आएको रहेछ। यसपटक उनीहरूलाई पक्राउ गरेका हौँ,” डीएसपी त्वातीले भने।

पक्राउ परेकाहरूलाई जिल्ला प्रहरी कार्यालय बागलुङमा राखिएको छ भने बरामद काठको डिभिजन वन कार्यालयले नापजाँच तथा अनुसन्धान गरिरहेको प्रहरीले जनाएको छ।

अवैध काठ ओसारपसारसम्बन्धी अनुसन्धानका लागि जिल्ला प्रशासन कार्यालय बागलुङबाट उनीहरूविरुद्ध १० दिनको म्याद थप गरिएको छ।

अनुसन्धान पूरा भएपछि आवश्यक कानुनी प्रक्रियाका लागि उनीहरूलाई डिभिजन वन कार्यालयको जिम्मा लगाइने डीएसपी त्वातीले जानकारी दिए।