काठमाडौं । भोटेकोशी बाढी र लगातारको वर्षासँगै आएको पहिरोले देशका विभिन्न प्रमुख सडक तथा राजमार्ग अवरुद्ध भएका छन्। सडक भासिने, नदीले कटान गर्ने तथा पहिरो खस्ने क्रम जारी रहेपछि विभिन्न जिल्लामा यातायात सेवा प्रभावित भएको छ।

प्रहरी प्रधान कार्यालयका अनुसार पृथ्वी राजमार्गअन्तर्गत धादिङको बेनिघाट रोराङ गाउँपालिका–७ स्थित कृष्णभीरमा त्रिशूली नदीले सडकको तल्लो भाग कटान गर्दा सडक भासिएको छ। सडकको ठूलो हिस्सा क्षतिग्रस्त भएपछि मानिससमेत आवतजावत गर्न नसक्ने गरी राजमार्ग पूर्ण रूपमा अवरुद्ध भएको छ।

त्यसैगरी, धादिङकै गजुरी गाउँपालिका–२ स्थित परेवाभिरमा बाढीका कारण सडकको तल्लो भाग भासिएपछि सडक पूर्ण रूपमा अवरुद्ध भएको प्रहरीले जनाएको छ।

यता, निरन्तर वर्षाका कारण मुगुबाट गमगढीतर्फ जाने सडक समेत अवरुद्ध भएको छ। सडक अवरुद्ध हुँदा स्थानीय आवागमनमा समस्या भएको छ।

ओखलढुंगाको सिद्धिचरण लोकमार्गअन्तर्गत मानेभञ्ज्याङ गाउँपालिका–६ र ७ जोड्ने सडक पनि अवरुद्ध भएको छ।

त्यस्तै, लमजुङको मर्स्याङ्दी गाउँपालिका–४ श्रीचौरस्थित बेँसीसहर–मनाङ सडक पनि पूर्ण रूपमा अवरुद्ध रहेको प्रहरी प्रधान कार्यालयले जनाएको छ।

लगातारको वर्षा, नदी कटान र पहिरोका कारण सडक पूर्वाधारमा थप क्षति पुग्ने जोखिम कायमै रहेकाले प्रभावित क्षेत्रमा यात्रा गर्दा विशेष सावधानी अपनाउनुपर्ने अवस्था देखिएको छ।

Originally published on abcnews.com.np.