काठमाडौं । राष्ट्रिय स्वतन्त्र पार्टी (रास्वपा) का सांसद दीपक बोहोराले त्रिशूली–३ ‘ए’ जलविद्युत् आयोजनाको सुरुङमा फसेकाहरूको अवस्था तत्काल सार्वजनिक गर्न सरकारसँग माग गरेका छन्।

बिहीबार बसेको प्रतिनिधिसभा बैठकमा बोल्दै सांसद बोहोराले सुरुङभित्र फसेका व्यक्तिहरू जीवित छन् कि छैनन् भन्नेबारे समेत प्रश्न उठिरहेको भन्दै खोज तथा उद्धार कार्यलाई तीव्रता दिन सरकारको ध्यानाकर्षण गराए।

उनले कञ्चनपुरका विनोदप्रसाद पाण्डे सुरुङभित्र रहेको जानकारी गराउँदै उद्धारका लागि आवश्यक प्राविधिक क्षमता र स्रोतसाधनबारे सरकारसँग जवाफ मागे।

“त्रिशूली–३ ‘ए’मा खोल्न मिल्ने हो कि होइन ? नेपाल सरकारले सक्ने हो कि होइन ? कसको एफोर्ट लाग्ने हो ? त्यो सुरुङमा मान्छे जीवित छन् कि छैनन् ? कसले भन्दिने हो खासमा ?”

सांसद बोहोराले सुरुङभित्र फसेकाहरूको वास्तविक अवस्था पत्ता लगाउन सरकार गम्भीर र सक्रिय हुनुपर्ने बताए।

विदेशी सहयोग आवश्यक भए तत्काल माग्न सुझाव

उनले उद्धारका लागि नेपालसँग पर्याप्त प्रविधि तथा उपकरण नभए विदेशी सहयोग लिन ढिलाइ गर्न नहुने बताए।

‘विदेशी सहयोग कहीँबाट आउने भए बताउनुस्,’ भन्दै उनले आवश्यक परे अन्तर्राष्ट्रिय स्तरबाट प्राविधिक जनशक्ति तथा उपकरण झिकाएर भए पनि उद्धार अभियान अघि बढाउन आग्रह गरे।

बोहोराले भविष्यमा यस्ता विपद्को जोखिम न्यूनीकरणका लागि नेपालका हिमताल तथा जोखिमयुक्त क्षेत्रमा एआई जडित क्यामेरा तथा निगरानी प्रविधि प्रयोग गर्न सकिने धारणा पनि राखे।

उनका अनुसार आधुनिक प्रविधिको प्रयोगमार्फत हिमताल तथा हिमाली क्षेत्रमा हुने सम्भावित जोखिमको पूर्वसूचना प्राप्त गर्न सकिने भएकाले सरकारले त्यसतर्फ समेत ध्यान दिन आवश्यक छ।

Originally published on abcnews.com.np.