काठमाडौं । बाढी तथा पहिरोपछि हैजा र अन्य पानीजन्य रोगको जोखिम बढेपछि रसुवामा हैजाविरुद्धको २१ हजार डोज खोप पठाइएको छ।

विश्व स्वास्थ्य संगठन (डब्लुएचओ)को सहयोगमा प्राप्त खोप नेपाली सेनाको हेलिकप्टरमार्फत आइतबार बिहान रसुवा पठाइएको हो। बाढीका कारण सडक यातायात प्रभावित रहेकाले जोखिमयुक्त क्षेत्रमा खोप तत्काल पुर्‍याउन हेलिकप्टर प्रयोग गरिएको स्वास्थ्य सेवा विभागले जनाएको छ।

स्वास्थ्य तथा खाद्य स्वच्छता मन्त्री निशा मेहताले बाढी प्रभावित क्षेत्रमा हैजा तथा अन्य पानीजन्य रोगको जोखिम न्यूनीकरणका लागि औषधि, खोप, स्वास्थ्य सामग्री र आवश्यक जनस्वास्थ्य सेवा तत्काल उपलब्ध गराउन निर्देशन दिएकी छन्।

मन्त्रीको निर्देशनअनुसार प्रभावित क्षेत्रमा खोप तथा औषधि पठाउने, रोग निगरानी बढाउने, सुरक्षित खानेपानी र सरसफाइमा विशेष ध्यान दिने तथा आवश्यक स्वास्थ्यकर्मी परिचालन गर्ने काम अघि बढाइएको स्वास्थ्य अधिकारीहरूले बताएका छन्।

बाढीका कारण खानेपानीका मुहान तथा वितरण प्रणालीमा क्षति पुगेकाले पानीजन्य रोगको जोखिम बढेको छ। त्यसैले प्रभावित क्षेत्रमा रोकथाम, रोगको शीघ्र पहिचान तथा उपचार व्यवस्थापनलाई प्राथमिकता दिइएको छ।

स्वास्थ्य सेवा विभागका अनुसार रसुवासँगै बाढीबाट प्रभावित अन्य जिल्लामा पनि आवश्यकताअनुसार हैजाविरुद्धको खोप तथा स्वास्थ्य सामग्री पठाउने तयारी भइरहेको छ। खोप सम्बन्धित क्षेत्रमा पुगेपछि स्थानीय स्वास्थ्य निकायसँग समन्वय गरी जोखिममा रहेका समुदायलाई लक्षित गरेर खोप अभियान सञ्चालन गरिनेछ।

यससँगै हैजा तथा अन्य पानीजन्य रोगको निगरानी, शीघ्र पहिचान र उपचार, सुरक्षित खानेपानी तथा सरसफाइसम्बन्धी गतिविधिलाई पनि एकीकृत रूपमा अघि बढाइने जनाइएको छ।

बाढीपछि पानीका स्रोत प्रदूषित हुने, सरसफाइ कमजोर हुने तथा सुरक्षित खानेपानीको अभाव हुने भएकाले हैजा र झाडापखालालगायतका रोग फैलिन सक्ने जोखिम बढेको स्वास्थ्य अधिकारीहरूको भनाइ छ।

Originally published on abcnews.com.np.