मोरङ । मोरङको उर्लाबारी नगरपालिका—६ मा रहेको पानी उत्पादन कम्पनी आर.के.इण्डष्ट्रिज प्रालीमा क्षेत्रीय खाद्य तथा गुण नियन्त्रण कार्यालय विराटनगरले शुक्रबार दिउसो शिलबन्दी गरेको छ ।

आर.के.इण्डष्ट्रिज प्रालीले उत्पादन गर्दै आएको ओजन पानीको बोतलमा पटक—पटक लेदो, लेउ लगायतका अखाद्य बस्तु भेटिएको गुनासो भएपछि जिल्ला प्रशासन कार्यालय मोरङ, पानी व्यवसायी संघ सहितको टोली क्षेत्रीय गुण नियन्त्रण कार्यालय अनुगमनका लागि उर्लाबारी पुगेको थियो ।

अनुगमणको क्रममा पानी उद्योग मापदण्ड विपरित पाइएकोले शिलबन्दी गर्नुपरेको क्षेत्रीय खाद्य तथा गुण नियन्त्रण कार्यालय विराटनगरका खाद्य निरीक्षक प्रेम अर्यालले बताए । ओजन पानीमा अखाद्य वस्तु लेदो भेटिएको भन्दै स्थानीय गणेश विष्टले उजुरी दिएका थिए ।
उपभोक्ताको गुनासोको आधारमा उर्लाबारीबाट प्रकाशित राष्ट्रिय समाचार पात्र दैनिकका ओजन पानीको समाचार प्रकाशन भएको थियो । समाचार प्रकाशन भएको प्रतिशोधमा दैनिकका सम्पादक केदार चौहान विरुद्ध उद्योग सञ्चालक ध्रुर्बचन्द्र पराजुलीले इलाका प्रहरी कार्यालयमा उजुरी दिएका थिए ।

उद्योगसग ब्लाकमेलिङ गरेको आरोपसहित दिइएको उजुरीको आधारमा प्रहरीले पक्रेको चौहानलाई आरोप पुष्टि नभएपछि शुुक्रबार जिल्ला प्रहरी कार्यालय मोरङबाट रिहाइ भएका छन् ।