काठमाडौं,३१ साउन । दोहाबाट उडान शुरु गरेको नेपाल वायुसेवाको नयाँ एयरबस ३२० अन्नपूर्णले आजबाट भारतको बैंगलोरमा पनि उडान थालेको छ । यसैगरी निगमले नयाँ दुई वाइडबडी अन्नपूर्ण र मकालुलाई जापान, कोरिया र साउदीको रियादमा पनि उडाउने प्रक्रिया तीव्र पारेको छ । तीन वटै गन्तब्यमा निगमले सीधा उडान थाल्न लागेको हो ।

नेपाल वायुसेवाको सहप्रवक्ता शैलेश कंशाकारका अनुसार निगमले कोरियामा ग्लोलब सेल्स एजेन्ट नियक्ति गरिसेकेको छ । जापनमा पनि त्यसका लागि प्रक्रिया अघि बढेको उनले बताए । यस्ता एजेन्टले टिकेटिङ र मार्केटिङको जिम्मा लिन्छन् ।

निगमले जापानको नारिता एयरपोर्टमा उडान भर्ने योजना बनाएको छ । कोरियाको सियोलमा इन्चोनसम्म पनि सीधा उडानकै योजना छ । साउदीको रियाद पनि वाइडबडीले तय गर्ने नयाँ गन्तब्य हुनेछ ।

निगमको एयरबस अन्नपूर्णले सेवा दिइरहँदा मकालु एयरबसले भने अझै सरकारबाट एओसी पाएको छैन । भन्सारको प्रक्रिया पुरा भएको र अब नागरिक उड्ययन प्राधिकरणबाट उडान अनुमति छिट्टै प्राप्त हुने कंशाकारले बताए । वाइडबडी दिनमा १२ देखि १४ घण्टासम्म उडान मिल्छ ।

यसपछि निगमले मकालुको परीक्षण उडान गरेर सेवाको थालनी गर्नेछ । निगमसँग अहिले अन्तर्राष्ट्रिय उडानका लागि दुई न्यारोबडी एयरबस र एउटा बोइङ पनि छ ।