काठमाडौं ५ असोज । एक दिनअघि  आइतबार मात्रै इलामको देउमाइ नगरपालिका– ७ सिद्दिथुम्का  आमालाई फोन गरेका बलबहादुर कुलुङले सोमबार राती विरानो देशमा संसार छोडेका छन । दसैँ आउन एक महिना मात्रै बाँकी भएकाले फूलमायाले छोरालाई यसपालीको दसैँमा घर आउन आग्रह गरिकी थिइन् ।

तर उनले यो वर्ष बहिनी आइन भने आफू अर्को वर्ष मात्रै आउने आमालाई बताएका थिए । उनकी बहिनी अहिले अमेरिकामा छिन् ।

दसैँमा घर नआउने भएपनि आमालाई सुन किनिदिने योजना बनाएका बलबहादुरले विषाक्त रक्सी कारण ज्यान गयो । आमाले उसलाई जसरी पनि आइज भनेकी थिएन , तर उनले मेरो चिन्ता नलिनु बहिनीसँग बस्दै गर्नु तपाईंलाई मंसिरमा सुन किन्ने पैसा पठाउँछु भनेका थिए ।

सुन किनेर लगाउनु भन्यो’ फूलमाया भन्छिन ।अर्को वर्षको दसैँ बहिनी, तपाईं र म भएर मनाउनुपर्छ भनेको थियो ।’ तर फूलमायाले छोराको त्यही बोली नै अन्तिम होला अनि अब कहिल्यै छोरासँग दसैँ मनाउन पाइँदैन भनेर सोचेकी थिएनन् ।

बलबहादुर मलेसिया गएको ६ वर्ष भयो । उनी सेक्युरिटी गार्डमा जति तलब हुन्छ भनेर मलेसिया पुगेपनि, कम्पनीले समयमा तलब पनि दिएन । दुई वर्षको सम्झौता उनले त्यही कम्पनीमा काटनु प¥यो ।

तलब नपाउने समस्याकै कारण उनी भागेर काम गर्न थालेका थिए । भागेर काम गरिरहेको कुरा पनि बलबहादुरले आमालाई सुनाएका थिए । केही महिनाअघि मलेसियामा अवैधानिक भएर काम गरिरहेकाहरु मलेसिया सरकारले दिएको आममाफीमा नफर्किए पक्रिने खबर रेडियो, टिभीले भनेका भन्यै थिए । फूलमायाले पनि खबर सुन्नुभयो । छोरालाई उनले भागेर काम नगर्न भन्दै आग्रह गरिकी थिइन् ।

तर बलबहादुरले अवैधानिक भएपनि काम सजिलो अनि कमाइ धेरै हुने भएकाले नफर्किने बताए । एक वर्ष अवैधानिक भएर बसेरै कमाउने अनि अर्को मंसिरमा घर फर्किने योजना थियो बलबहादुरको ।

मलेसियाबाट फर्किएर युएई जाने तयारीमा रहेका बलबहादुर  त्यसकै लागि पैसा जुटाउन पनि अब एक वर्ष बस्ने आमासगं भनेका थिए । तर अर्को वर्षको दसैँ आमासँग मनाउने अनि कमाउने फेरि युएई जाने बलबहादुरका सपना मलेसियामै बिलाए ।