काठमाडौं, २८ मंसिर । नेपाली कांग्रेसका सभापति शेरबहादुर देउवा वरिष्ठ नेता रामचन्द्र पौडेललाई फकाउन उहाँकै निवास पुग्नुभएको छ ।

शुक्रबारको केन्द्रिय कार्यसमिति बैठक बहिस्कार गर्नुभएका नेता पौडेललाई फकाउन देउवा शनिबार बिहान बोहराटार पुग्नुभएको हो । भेटमा चुनौतीपूर्ण घडीमा पार्टी एक भएर जानुको विकल्प नभएको भन्दै सबै कुरा मिलाएर अगाडी बढ्ने विषयमा कुराकानी नेताहरुले बताएका छन् । सभापति देउवालाई हतारमा अगाडी बढ्नुभन्दा पनि संयमतापूर्वक र उदारतापूर्वक पार्टीलाई एक बनाएर अगाडी बढ्नुपर्ने सुझाव देउवालाई आफुले दिएको पौडेलले बताउनुभयो ।

पार्टीलाई एक बनाएर अगाडी बढ्ने भूमिका पार्टी सभापतिको रहेको र उहाँलाई सहयोग गर्न सबै तयार रहेको उहाँले बताउनुभयो । भेटमा सभापति देउवासँग पार्टीलाई एकजुट बनाएर अहिलेको चुनौतीको सामना गर्न पार्टीभित्र के कस्ता समस्या छन् ती समस्याको समाधान कसरी गर्न सकिन्छ भन्ने विषयमा छलफल भएको पौडेलले बताउनुभयो । सभापतिको कार्यकाल कति थप हुने भन्ने कुरा महाधिवेशन कार्यतालिकाले निर्धारण गर्ने भएकाले यो एजेण्डा बैठकमा प्रस्तुत हुनुपर्ने उहाँको धारणा थियो ।

पार्टीभित्र देखिएको असमझदारीलाई हल गर्न पौडेल समूहबाट प्रकाशमान सिंह र देउवा समूहबाट विमलेन्द्र निधिको संयोजकत्वमा वार्ता समिति गठन गरिएको छ । आफुहरुको पहिलो एजेण्डा महाधिवेशनको कार्यतालिका सार्वजनिक हुनुपर्ने रहेको र यसलाई वार्ता समितिले टुंगो लगाउने नेता पौडेलले बताउनुभयो । छलफलमा सहभागि उपसभापति विमलेन्द्र निधिले समायोजनको काम सकिएपछि महाधिवेशन कार्यतालिका सार्वजनिक गर्ने विषयमा पहिले नै सहमति भइसकेकाले यो विषयलाई अन्यथा लिन नहुने बताउनुभयो ।

महाधिवेशन कार्यतालिका बनाउन एक वर्षको समय थप गर्नुपर्ने आवश्यकता रहेको बताउँदै उहाँले महाधिवेशनको कार्यतालिका नै नबनाउने नभनेको बताउनुभयो । पार्टी सभापति र वरिष्ठ नेता पौडेलबीचको छलफल सकारात्मक भएको उहाँको भनाई छ । पार्टीका केन्द्रिय सदस्य हृदयराम थानीले प्रजातान्त्रिक पार्टीभित्र लाइभ म्याण्डेडका कुराहरु आउने भएकाले यसलाई सकारात्मक रुपमा लिनुपर्ने बताउनुभयो । सबैको लक्ष्य र पुग्ने विन्दु एउटै भएकाले एकजुट भएर जाने परिस्थितीको निर्माण हुनुपर्ने भन्दै उहाँले शनिबारको छलफल सकारात्मक भएको बताउनुभयो । थानी पनि देउवा पौडेलको छलफलमा सहभागि हुनुहुन्थ्यो । शुक्रबारको बैठकमा पार्टीको १४ औं महाधिवेशनको कार्यतालिका सार्वजनिक गर्ने विषयमा प्रस्ताव पेश नभएपछि पौडेल समूहले बैठक बहिस्कार गरेको थियो ।