काठमाण्डौं, ३ मंसिर । इंग्लिस प्रिमियर लिग फुटबल अन्तर्गत गएराति भएको खेलमा आर्सनलले उपाधि होडमा आफूलाई प्रस्तुत गर्दै आएको टोटनह्यामलाई पराजित गरेको छ ।

घरेलु मैदानमा भएको खेलमा डर्बीमा आर्सनलले टोटनह्यामलाई २–० ले हराएको हो । आर्सनलको जितमा दुवै गोल पहिलो हाफमा नै भएका हुन् । गोल श्कदान मुस्ताफी र एलेक्स सान्चेजले गरेका हुन् । ३६ औं मिनेटमा मुस्ताफीले हेडमार्फत गोल गर्दै घरेलु टोलीलाई सुरुवाति अग्रता दिलाए । त्यसको पाँच मिनेटपछि सान्चेजले गोल गर्दै अग्रता दोब्बर पारे । पहिलो हाफमा २–० को अग्रता लिएको आर्सनलले दोस्रो हाफमा थप गोल गर्न सकेन भने माउरिसिओ पोकेटिनोको टिम टोटनह्यामले पनि गोल फर्काउन सकेन र आर्सनल विजयी भयो । जितपछि छैटौं स्थानको आर्सनलको १२ खेलबाट २२ अंक भएको छ । २३ अंक रहेको टोटनह्याम भने चौथो स्थानमा झरेको छ ।