काठमाडौं । भारतले बाढी प्रभावित नेपालका लागि १० टन राहत तथा उद्धार सामग्री र औषधि पठाएको छ। भारतीय विदेशमन्त्री डा. एस जयशंकरले मानवीय सहायता सामग्री काठमाडौं पठाइएको जानकारी दिएका छन्।

सामाजिक सञ्जाल एक्समार्फत जानकारी दिँदै विदेशमन्त्री जयशंकरले रसुवाको भोटेकोशीमा आएको बाढीबाट प्रभावित नेपालीलाई भारतले मानवीय सहायता उपलब्ध गराएको बताएका छन्।

उनले बाढीमा परी ठूलो मानवीय क्षति भएको उल्लेख गर्दै पीडित परिवारप्रति समवेदना व्यक्त गरेका छन्। भारत नेपाल र नेपाली जनताको साथमा रहेको भन्दै जयशंकरले विपद्को यस कठिन समयमा आवश्यक सहयोग जारी राख्ने प्रतिबद्धता व्यक्त गरेका छन्।

एचएडीआरअन्तर्गत सहायता

भारत सरकारले एचएडीआर (Humanitarian Assistance and Disaster Relief) अन्तर्गत राहत तथा उद्धार सामग्री र आवश्यक औषधि नेपाल पठाएको हो।

भोटेकोशी बाढीबाट भएको जनधनको क्षतिप्रति दुःख व्यक्त गर्दै भारतले विपद् व्यवस्थापन तथा उद्धार कार्यमा नेपाललाई आवश्यक सहयोग गर्ने जनाएको छ।

Originally published on abcnews.com.np.