काठमाडौं, १ साउन । भारतीय विदेश मन्त्रालयले नेपालका प्रधानमन्त्री केपी शर्मा ओलीको अयोध्याबारेको भनाईका सन्दर्भमा कुनै टिप्पणी नगर्ने जनाएको छ।
बिहिबार दिल्लीमा आयोजित पत्रकार सम्मेलनका क्रममा भारतीय विदेशमन्त्रालयका प्रवक्ता अनुराग श्रीवास्तवले नेपालको परराष्ट्र मन्त्रालयले अयोध्याबारे प्रधानमन्त्री ओलीको भनाइका सन्दर्भमा स्पष्ट पारिसकेकाले थप टिप्पणी आवश्यक नरहेको बताएका हुन।
प्रवक्ता श्रीवास्तवले भारतको साँस्कृतिक विरासतबारे विश्वलाई थाहा भएका भन्दै यस अभिव्यक्तिका बारे अरु कुनै टिप्पणी गर्न नचाहेको बताए।
प्रधानमन्त्री केपी शर्मा ओलीले भगवान राम भारतीय नभएको र उनको जन्मभूमि अयोध्या नेपालमै रहेको अभिव्यक्ति दिएका थिए।
प्रधानमन्त्री ओलीको अभिव्यक्तिको व्यापक आलोचना भएपछि नेपालको परराष्ट्र मन्त्रालयले स्पष्टीकरण दिएको थियो।
मङ्गलवार साँझ जारी गरेको विज्ञप्तिमा परराष्ट्रले प्रधानमन्त्री ओलीको भनाइ ‘कुनै राजनीतिक विषयसँग सम्बन्धित नभएको’ र ‘कसैको भावनामा आघात पुर्याउने उद्देश्यले नगरिएको’ बताएको थियो।
‘प्रधानमन्त्रीेले दिनुभएको अभिव्यक्ति कुनै पनि राजनीतिक बिषयसँग सम्बन्धित छैन र कसैको भावना र आस्थामा चोट पुर्याउने मनसाय त्यसमा छैन।’ विज्ञप्तिमा भनिएको थियो।
तर, परराष्ट्रले श्रीरामका बारेमा थप अध्ययन र अनुसन्धान गर्नुपर्नेमा प्रधानमन्त्रीले जोड दिएको उल्लेख गरेको छ।
‘श्रीराम र उहाँसँग सम्बन्धित ठाउँहरुबारे थुप्रै अनुमान र सन्दर्भहरु भएको हुँदा प्रधानमन्त्रीले रामायणले प्रतिनिधित्व गर्ने विशाल सांस्कृतिक भूगोलको थप अध्ययन र अनुसन्धान गर्नुपर्ने महत्वमाथि प्रकाश पार्नु भएको हो,’।
प्रतिक्रिया दिनुहोस्