काठमाडौं, १३ साउन । नेकपाका उपाध्यक्ष बामदेव गौतमलाई भेट्न प्रधानमन्त्रीसमेत रहेका पार्टी अध्यक्ष केपी शर्मा ओली गौतम निवास भैसेपाटी पुगेका पुग्नु भएको छ । प्रधानमन्त्रीका साथमा नेकपाका महासचिव विष्णुप्रसाद पौडेल जानु भएको छ । ओलीले आजको स्थायी कमिटी बैठक स्थगित गरेपछि अर्का अध्यक्ष पुष्प कमल दाहाल प्रचण्डले बैठक संचालन गर्नुभएको थियो । नेकपाभित्र दुई अध्यक्ष प्रधानमन्त्री ओली र अर्का अध्यक्ष प्रचण्डबीच विवाद उत्कर्षमा पुगेपछि अहिले दौडधुप चलिरहेको छ।

प्रधानमन्त्री ओलीले दुवै पदबाट राजीनामा दिनुपर्ने माग प्रचण्ड– नेपाल समूहले राख्दै आएका छन् भने प्रधानमन्त्रीले दुवै पद नछोड्ने अडान राख्दै आएका छन् ।

प्रधानमन्त्री ओलीले चाँडो एकता महाधिवेशन गरेर अध्यक्ष तथा साढे दुई वर्षपछि निर्वाचन गराएर प्रधानमन्त्री पद छोड्ने बताउँदै आउनु भएको छ । उपाध्यक्ष गौतमले मंगलबार ६ बुँदे प्रस्ताव सार्वजनिक गर्दै आफूलाई ओलीको पक्षमा उपस्थिति देखाउनु भएको थियो । आज तीन नेताबीच भैंसेपाटीमै खाना खाने कार्यक्रम तय गरिएको नेकपा स्रोतले जनाएको छ । मंगलबार बालुवाटारमा भएको प्रचण्ड–नेपाल समूहका स्थायी कमिटी बैठकमा उपाध्यक्ष गौतमले आफूले राखेको ६ बुँदे प्रस्तावबारे आफ्नो धारणा ब्यक्त गर्नुभएको थियो ।