काठमाडौं, २८ भदौ । सत्तारुढ नेपाल कम्युनिष्ट पार्टी (नेकपा) प्रवक्ता नारायणकाजी श्रेष्ठ प्रकाशले कोभिड–१९ स्वयंसेवा (सिभिएस)गठन गर्नुभएको छ ।

श्रेष्ठले कोरोनाको संक्रमण नियन्त्रणका लागि सरकारले आफ्नो कामलाई प्रभावकारी बनाउनुपर्ने बताउनु भएको छ । साथै सरकारको प्रयासलाई सफल बनाउन र संक्रमणबाट समाजलाई बचाउन सबैले आफ्नो ठाउँबाट सहयोग गर्नु पर्ने भएकाले स्वयंसेवा गठन गरेको नेकपा उहाँले बताउनुभयो ।

श्रेष्ठको निजी सचिवालय अन्तरगत गठित कोभिड–१९ स्वयंसेवाले कोभिड उपचारसम्बन्धि प्रकिया र उद्धारमा सहजीकरणका साथै मनोसामाजिक र आपतकालीन स्वास्थ्य परामर्श दिने जनाइएको छ ।  प्रवक्ता श्रेष्ठको सचिवालय अन्तर्गत रहने सिभिएसले कोभिड उपचार सम्बन्धी प्रक्रिया र उद्धारमा सहजीकरण, समन्वय तथा सहयोग गर्ने, मनोसामाजिक परामर्श दिने,आपतकालीन स्वास्थ्य परामर्श, आप्रबासी श्रमिक उद्धार तथा सुरक्षित घर फिर्तिमा समन्वय तथा सहयोग गर्ने, कोभिड–१९ बारे सचेतना लगायतका काम गर्ने जनाइएको छ।

त्यस्तै कोभिड संक्रमण पुष्टि भएका व्यक्तिहरुलाई थप उपचार तथा अन्य सहयोग आवश्यक परेको खण्डमा अस्पताल, आइसोलेसन सेन्टर प्राप्त गर्न तथा त्यहाँ पुर्‍याउन सहयोग गर्ने भनिएको छ। २९ सदस्यस्यीय सिभिएसमा इन्द्र राज भट्टराई, सुरेश काजी श्रेष्ठ, सुमन आचार्य, प्रेम श्रेष्ठ, शुभद्रा खड्का, चमेली अंगाई, रोहित गुरुङ, लक्ष्मी गोर्खाली लगायत छन्।

सिभिएसले नेपाल सरकारको कोभिड–१९ रोकथाम, नियन्त्रण र उपचारसम्बन्धी नीति, योजना र निर्देशलाई मुल मार्गदर्शन मानी कार्यान्वयनमा सहयोग पुर्‍याउने श्रेष्ठको सचिवालयले जनाएको छ।