काठमाडौं, २५ माघ । घरमा युवती मृत फेला परेपछि कैलालीको गौरीगंगा –३ का एक जना वडा सदस्य पक्राउ परेका छन्। वडा सदस्य निरज चौधरीको घरको एक कोठामा २२ वर्षीया अञ्जिता चौधरी विहान मृत भेटिएकी थिइन्। उक्त घटनापछि दिउँसो प्रहरीले सोधपुछका चौधरीलाई धनगढीबाट पक्राउ गरेको हो।

जिल्ला प्रहरी कार्यालय कैलालीका प्रवक्ता तथा प्रहरी नायव उपरीक्षक प्रतीक बिष्टले वडा सदस्य चौधरीसहित उनीसँगै भागेर आएकी एकजना महिलालाई पनि नियन्त्रणमा लिइएको बताउनुभयो । ‘वडा सदस्य र एकजना महिलालाई सोधपुछका लागि नियन्त्रण लिएको प्रहरीले जनाएको छ ।

मृतकका परिवार अनुसन्धान गरिपाऊँ भन्दै प्रहरीमा जाहेरी दिने तयारी गरेको बताएका छन्। मृतकका दाइ राजेश चौधरीले निरज र अञ्जिताको प्रेम सम्बन्धमा रहेको र निरजले अर्की केटीसँग बिहे गरेपछि शनिबार राति केही विवाद भएको बताउनुभयो । निरजले अर्की महिलालाई भगाएर ल्याएपछि अञ्जिता र उनका माइती उनको घरमा पुगेका थिए।

दुबै पक्षबीच राति लामो छलफल भएको थियो। निरजले दुबैलाई श्रीमतीका रूपमा राख्ने भनेपछि माइती पक्ष अञ्जितालाई निरजकै घरमा छोडेर फर्किएका थिए। निरज राति नै अर्की महिलासंग भागेपछि अञ्जिताले माइतीलाई फोन गरी खबर गरेकी थिइन्। त्यसपछि बिहान उनको शव फेला परेको थियो। मृतकको शव पोष्टमार्टमका लागि सेती प्रादेशीक अस्पतालमा राखिएको छ।