काठमाडौं, ५ बैशाख । गृहमन्त्री रामबहादुर थापा बादलको राष्ट्रिय सभा सांसद पदसँगै मन्त्री पद गुमेको छ। नेकपा माओवादी केन्द्रले उहाँलाई पार्टीबाट निष्काशन गरिएको पत्र संघीय संसद सचिवालयमा पठाएको थियो। राष्ट्रिय सभा अध्यक्ष गणेश तिमिल्सिनाले पत्र अनुसार सांसद पद रिक्त भएको निर्णय गर्नुभएको छ। तिमिल्सिनाको निर्णयपछि संसद सचिवालयले उहाँको पद रिक्त सूचना प्रकाशित गरेको हो। थापा बागमती प्रदेशबाट राष्ट्रिय सभा सांसद बन्नुभएको थियो ।

अदालतको फैसलाबाट नेकपा छुट्टिएर साविकको पूर्व एमाले र पूर्व माओवादीमा रूपान्तरण हुँदा थापाले एमाले पार्टीमा रहनुभएको थियो । थापाको पद गुमेपछि अब उहाँले पुन: मन्त्री बन्न संविधानअनुसार सपथ लिनुपर्छ। यसअघि एमाले अध्यक्ष केपी शर्मा ओलीको पक्षमा लागेका माओवादी केन्द्रका सांसदहरूको पद पनि खारेज भएको थियो।

मन्त्रीसमेत रहेका लेखराज भट्ट, टोपबहादुर रायमाझी, प्रभु साह र गौरीशंकर चौधरीको सांसद पद गुमेको हो। सांसद पद गुमेपछि प्रधानमन्त्री ओलीले उनीहरूलाई फेरि ६ महिनाका लागि मन्त्री बनाउनुभएको छ । २०७४ मा राष्ट्रिय सभा सदस्य बनेका थापाको कार्यकाल ६ वर्ष थियो। चिठ्ठा तान्दा उहाँको कार्यकाल ६ वर्ष परेको थियो।