काठमाडौं, १४ कात्तिक । जेरुसेलम, इजरायलका प्रधानमन्त्री बेन्यामिन नेतान्याहूले हमासविरुद्ध युद्धविराम गर्न स्पष्ट रूपमा अस्वीकार गरेका छन् ।

“युद्धविराम गर्नु भनेको हमास र आतंकवादसँग आत्मसमर्पण गर्नु हो,” युद्धविरामका निम्ति संयुक्त राष्ट्रसंघीय एजेन्सीको माग अस्वीकार गर्दै सोमबार उनले भने ।

“यस्तो हुने छैन,” विदेशी पत्रकारसँग उनले भने, “इजरायलले विजय नभएसम्म यो लडाइँ लडिरहने प्रतिज्ञा गरेको छ ।”

अक्टोबर ७ मा प्यालेस्टाइनी लडाकु समूह हमासले आफ्नो भूमिमा आश्चर्यजनक हमला गरेपछि इजरायलले युद्धको घोषणा गरेको छ । हमासले गरेको हमलामा अधिकांश सर्वसाधारणसहित एक हजार ४०० जना मारिएका थिए । २३० नागरिकलाई बन्धक बनाइएको थियो ।

त्यसयता इजरायलले हमास शासित गाजामा ठूलो हवाई बमबारी अभियान चलायो । सेनाले उत्तरी गाजा क्षेत्रमा इजरायली सैनिकको तस्बिर जारी गरेको छ । सोमबार प्रत्यक्षदर्शीले गाजाको बाहिरी भागमा ट्यांकहरू रहेको बताएका छन् ।इजरायलले २४ घण्टामा ६०० लक्ष्यमा निसाना बनाएको जनाएको छ । यो अहिलेसम्मको सबैभन्दा ठूलो बमबारीमध्येको एक हो । सेनाले हमासबाट हराइरहेकी एक महिलालाई बचाएको जनाएको छ ।

प्रधानमन्त्री नेतान्याहूले युद्धले हमासलाई ‘समाप्त’ पार्ने वाचा गरेका छन् । उनका अनुसार हमास समाप्त भएपछि यस्ता समूहका हमला दोहोरिने सम्भावना हुँदैन ।

इजरायलले अक्टोबर ७ मा हमास र अरू प्यालेस्टाइनी लडाकु समूहले बन्धक बनाएकाहरूलाई मुक्त गर्ने पनि प्रतिबद्धता व्यक्त गरेको छ ।

संयुक्त राष्ट्रसंघले बारम्बार मानवीय युद्धविरामको आह्वान गरेको छ । सोमबार प्यालेस्टाइनी शरणार्थीका लागि राष्ट्रसंघीय एजेन्सी यूएनआरडब्ल्यूले इजरायलले घेराबन्दी गरेको क्षेत्रमा मानवीय सहयोग पूरा गर्न अपर्याप्त रहेको भन्दै त्यहाँ सीमित संख्यामा ट्रकहरू प्रवेश गरेको जनाएको थियो । रासस