काठमाडौं, १४ मंसिर । उच्च अदालतका इजलासहरू जुम्ला, महेन्द्रनगर, धनकुटा र हेटौँडामा श्रव्यदृश्य संवाद भिडियो कन्फरेन्स०मार्फत मुद्दाको सुनुवाइ सुरु गरिएको छ । बिहीबार सर्वोच्च अदालतमा आयोजित कार्यक्रममा प्रधानन्यायाधीश विश्वम्भरप्रसाद श्रेष्ठले सो सेवाको शुभारम्भ गरेका हुन् ।

कार्यक्रममा प्रधानन्यायाधीश श्रेष्ठले अब आ–आफ्नै घरबाट पनि न्याय पाउन सकिने बताए । उनले नेपालको भूभागको स्थिति हेरेर दुर्गमका नागरिकलाई आवश्यक पर्ने न्यायको पहुँच सहज गर्न यो काम गरिएको उल्लेख गरे ।

सर्वोच्चले यसअघि दिपायल उच्च अदालत र इलाम इजलासमा श्रव्यदृश्य संवादमार्फत मुद्दाको सुनुवाइ थालेको थियो । अब मुद्दाको फर्छ्योट चाँडै, कम खर्चिलो र न्यायमा पहुँच सरल हुने माध्यम बनेको उनले बताए ।

उनले कानुन व्यवसायीलाई पनि आफ्नै ‘चेम्बर’मा बसेर बहस गर्न सकिने फाइदा यो प्रविधिबाट हुने उल्लेख गरे । आउँदा दिनमा थप अध्ययन गरी श्रव्यदृश्य संवादमार्फत मुद्दाको सुनुवाइ गर्ने अभियान विस्तार गरिने उनको भनाइ छ ।