काठमाडौं, २४ मंसिर ।  एनसेलको सेयर खरिद–बिक्री प्रकरणमा कम्पनीका प्रमुख कार्यकारी अधिकृत सीईओको भूमिका पनि विवादित देखिएको छ । मलेसियन कम्पनी आजियाटा ग्रुप बहार्डको स्वामित्वमा रहेको एनसेलको ८० प्रतिशत सेयर नेपालीमूलका व्यापारी सतिशलाल आचार्यको कम्पनीले किनेको छ ।

विदेशी कम्पनीको लगानी हुँदा दूरसञ्चार ऐनअनुसार करिब ६ वर्षपछि एनसेलको सेयर सरकारी स्वामित्वमा आउँथ्यो । त्यो कानुनी व्यवस्था छल्न नेपालीमूलका व्यापारीसँग मिलेमतोमा खरिद–बिक्री भएको भन्दै यो विषय विवादित बनेको छ ।

अर्बौं आम्दानी र नाफा रहेको कम्पनी ६ अर्ब ६६ करोड रुपैयाँमा मात्रै बिक्री हुनुमा चलखेलको आशंका गरिएको हो । खरिदकर्ता नेपालीमूलका व्यापारी आचार्यले यो खरिद झन्डै ५३ अर्बको भएको दाबी गरेका छन् ।

आजियाटाले समेत एक खर्ब ४४ अर्ब रुपैयाँमा किनेको कम्पनी कसरी निकै कम मूल्यमा बेच्न सक्छ भन्ने प्रश्न उठेको छ । त्यसैले कम्पनीलाई सरकारी स्वामित्वमा जान नदिन सेयर स्वामित्व रणनीति बदलिएको आशंका गरिएको छ ।

यसबीच, गत अप्रिलमा मात्रै एनसेलको सीईओ बनेका जाब्बोर कायुमोभ पनि यो खरिद बिक्री प्रकरणमा मुछिएका छन् । व्यापारी आचार्यसँग जाब्बोरको पुरानो सम्बन्ध रहेको र एनसेलको ८० प्रतिशत सेयर खरिद बिक्री प्रक्रियामा पनि भूमिका खेलाउन उनी सीईओ बनेको आरोप लागेको छ ।

जाब्बोरले टेलिया सोनेरा, हालको टेलिया कम्पनीमा काम गरेका थिए । उनीसँग भिम्पेलकम नाम परिवर्तन भएर हाल भीओन, ताजिकिस्तानको टिसेललगायत दूरसञ्चार क्षेत्रमा २० वर्ष काम गरेको अनुभव भएको भनिएको छ ।

जाब्बोरले सतिशलाल आचार्यको समेत लगानी रहेको स्मार्ट टेलिकममा समेत काम गरेका थिए । जाब्बोरले सन् २०१३ देखि सन् २०१६ सम्म साढे तीन वर्ष स्मार्ट टेलिकमको सीओओ र सीईओको रुपमा काम गरेका थिए ।

त्यसअघि सन् २०११ र सन् २०१२ मा करिब १ वर्ष ८ महिना उनले एनसेलमा पनि सीओओको रुपमा काम गरेको उनी आफैले आफ्नो सोसल मिडिया प्रोफाइलमा उल्लेख गरेका छन् ।

प्रतिनिधिसभा सार्वजनिक लेखा समितिको बैठकमा सांसद डा। अमेरशकुमार सिंहले एनसेलको सेयर खरिद बिक्रीमा चलखेल गर्न सीईओ जाब्बोर कायुमोभलाई सतिशलाल आचार्यले सीईओ बनाएको दाबी प्रस्तुत गरेका थिए ।

आजियाटाबाट एनसेललाई फुत्काउन र सरकारको स्वामित्वमा आउन नदिन चलखेल भएको र त्यसमा आचार्यसँगै एनसेलका सीईओकोसमेत भूमिका रहेको सांसद सिंहको भनाइ छ ।

एनसेलको सीईओमा आउनुअघि जाब्बोर जमैकाको मोबाइल फोन नेटवर्क कम्पनी डीजीसेल ग्रुपको सीईओ थिए । यसअघि एनसेलमा यसै वर्षको मेसम्म एन्डी चोङ सीईओ थिए । आजियाटाले आफ्नो ग्रुप बाहिरको मान्छे जाब्बोरलाई सीईओको रुपमा भित्र्याउनुका पछाडि सतिशलाल आचार्यले कम्पनी किन्ने भएसँगै तय गरिएको आकलन गरिएको छ ।

यसरी पहिलेदेखि यो रणनीति बनेको र त्यहीअनुसार सीईओसमेत नियुक्त भएको विषयलाई आजियाटाले नै सतिशलाल आचार्यको स्पेक्ट्रलाइट युके लिमिटेडलाई कम्पनी बेचिसकेको घोषणा गरेपछि पुष्टि भएको छ ।

सतिशलाल आचार्य नेपालीमूलका नागरिक भएसँगै अब करिब ६ वर्षपछि एनसेलको लाइसेन्स सकिए पनि सरकारी स्वामित्वमा नआउन सक्छ । सरकारले गैरआवासीय नेपाली नागरिकलाई व्यवसायिक अधिकारका लागि नागरिकता प्रदान गरेको विषयले यो सम्भावना झन् बलियो बनाएको छ ।

सार्वजनिक लेखा समितिको बैठकमा सांसदहरुले यो सबै योजना निकै पहिलेदेखि बन्दै आएको र त्यही अनुसार गैरआवासीयलाई नागरिकतासमेत प्रदान गरिएको आरोप समेत लगाएका छन् । सांसद सिंहले यो प्रकरणमा प्रमुख नेता र सरकारका उच्चपदस्थ व्यक्तिहरुको हात रेहेको दाबी गरेका छन् ।

उनले व्यापारी आचार्यले आफ्नो योजनाअनुरुप काम सफल पार्न एनसेलका सीईओ मात्रै नभएर अन्य कर्मचारीहरु समेत आफू अनुकूलका पदस्थापन गराएर भूमिका खेलाएको बताएका छन् ।