काठमाडौं, २ पौष । कानुन व्यवसायी पृष्ठभूमिबाट न्यायाधीशमा प्रस्तावित वरिष्ठ अधिवक्ता सुनिलकुमार पोखरेलले न्यायपालिकाप्रति जनआस्था अभिवृद्धि र देखिने किसिमको न्यायसम्पादन गर्ने प्रतिबद्धता जनाएका छन् ।

सोमबार संसदीय सुनुवाइ समितिमा आफ्नो अवधारणा र कार्ययोजना प्रस्तुत गर्दै पोखरेलले धेरै वकिल भएका मुद्दामा ‘लिड लयर’को अभ्यास र रिटहरूमा व्यक्तिको सम्पत्ति र विषयको ‘अर्जेन्सी’लाई हेरेर आदेश गर्नुपर्ने औँल्याएका छन् ।

न्यायिक सुधारका क्षेत्रमा आफूले नेपाल बार एसोसिएसनको नेतृत्व तहमा रहँदा समेत काम गरेको उनले उल्लेख गरेका छन् । त्यो अनुभवलाई न्यायिक सुधारमा प्रयोग गर्ने प्रतिबद्धता उनले व्यक्त गरेका छन् ।

“न्यायसम्पादनका क्रममा आफूसमक्ष आएको विवादलाई नपन्छाई, कसैप्रति पूर्वाग्रह नराखी, संविधान, कानुन र मान्य सिद्धान्तका आधारमा निर्णय लिनुपर्छ भन्नेमा प्रतिबद्ध छु ।

न्यायाधीशको निर्णयबाट एउटा पक्षको हार र अर्को पक्षको जितको अवस्था स्वभाविक हुन्छ । यो जित र हारको अवस्था न्यायाधीशको इच्छामा नभई संविधान, कानुन र प्रमाणहरूका आधारमा तय हुन्छन्,” पोखरेलले भनेका छन्, “यस्तो अवस्थामा मुद्दाका पक्षहरूले न्यायसम्पादन गर्ने न्यायाधीशको न्यायिक मन र विवकेशमा प्रश्न उठाउने अवस्था बन्नु हुन्न भन्नेमा सचेत छु ।”